Қорақалпоғистон Республикаси ва Хоразм вилоятини электр
энергияси билан таъминлашда асосий энергия манбаларидан бири бўлган "Тахиатош
ИЭС" АЖ ушбу масъулиятли вазифани муваффақиятли бажариб келмоқда. Бугунги
кунда станция кундалик эҳтиёждан келиб чиқиб бир кеча-кундузда ўртача 11
миллион киловатт-соат электр энергияси ишлаб чиқариб, минтақа энергетика
тизимининг барқарор ишлашига салмоқли ҳисса қўшмоқда.
Электр энергияси ишлаб чиқариш - юқори технологиялар
билан бир қаторда юксак масъулиятни ҳам талаб этади. Чунки энергетика соҳасида
ҳар бир ускуна, ҳар бир технологик жараён ва ҳар бир қарор инсон ҳаёти билан
бевосита боғлиқ. Шу боис хавфсизлик масалалари ҳар доим биринчи ўринда туради.
Шу мақсадда "Тахиатош ИЭС" АЖда 2026 йил 1
июндан 1 июлгача "Хавфсизлик техникаси бўйича кўрик ойлиги"
ўтказилмоқда. Кўрик ойлигининг асосий мақсади - хавфсизлик маданиятини
мустаҳкамлаш, бахтсиз ҳодисаларнинг олдини олиш, меҳнатни муҳофаза қилиш
талабларига риоя қилишни кучайтириш ва энг қимматли бойлигимиз бўлган инсон
ҳаёти ва саломатлигини муҳофаза қилишдан иборат.
Кўрик ойлиги давомида станциянинг барча цех ва
бўлимларида иш ўринларининг ҳолати ўрганилиб, хавфсизлик қоидаларига риоя
этилиши текширилмоқда. Шу билан бирга ходимлар учун ўқув семинарлари, амалий
машғулотлар, биринчи тез тиббий ёрдам кўрсатиш бўйича машғулотлар, авария ва
фавқулодда вазиятларда ҳаракат қилиш бўйича махсус ўқувлар ташкил этилмоқда.
Алоҳида таъкидлаш керак, энергетика соҳасида хавфсизлик
фақат қоғоздаги талаб эмас. Бу ҳар бир ходимнинг касбий маданияти, жамоа
олдидаги масъулияти ва оиласи олдидаги бурчидир. Чунки ҳар бир энергетикнинг
соғ-саломат ишлаши, кун охирида ўз уйига соғ-саломат қайтиши энг асосий
мақсадлардан бири.
Ойлик давомида хавфсизлик қоидаларига намунали риоя
этиб келаётган ходимларнинг тажрибаси кенг оммалаштирилмоқда, касбий маҳорат
мусобақалари ўтказилиб, энг яхши натижа кўрсатган ходимлар ва бўлинмалар тақдирланмоқда.
Бу эса жамоа ўртасида хавфсизлик маданиятини янада юксалтиришга хизмат қилади.
Қорақалпоғистон Республикаси ва Хоразм вилояти
аҳолисининг энергияга бўлган эҳтиёжини қондираётган "Тахиатош ИЭС"
АЖда олиб борилаётган шундай тадбирлар энергетика ускуналарининг ишончли
ишлашига, бахтсиз ҳодисаларнинг олдини олишга ва энг асосийси инсон ҳаёти ва
саломатлигини ҳимоя қилишга қаратилган.
Чунки хавфсизлик - бу фақат қоида эмас, у барқарор
энергия ишлаб чиқариш, ишончли фаолият ва ёруғ келажакнинг мустаҳкам
кафолатидир.
Минажатдин
ҚУТЛЫМУРАТОВ,
«Янги Ўзбекистон»
мухбири.
