Давлат хавфсизлик хизмати ходимлари томонидан Бош прокуратура ҳузуридаги Департамент ҳамда ички ишлар органлари билан ҳамкорликда ўтказилган тезкор тадбирларда ишга киритиш, рухсатнома олиб бериш ва нафақа тайинлаш билан боғлиқ бир қатор коррупцион ҳолатлар фош этилди.

Маълум қилинишича, Хоразм вилоятида ИИБ Жамоат тартибини сақлаш бошқармаси кичик инспектори Хонқа туманида яшовчи фуқаронинг ишончига кириб, унинг танишини ички ишлар органларига ишга жойлаштириш эвазига 4500 АҚШ доллари талаб қилган. Тезкор тадбир давомида у олдиндан 1800 АҚШ доллари ва 2,4 миллион сўм олган вақтида қўлга олинган.

Тошкент вилоятидаги ҳолатда эса туман Мактабгача ва мактаб таълими бўлими методисти хусусий оилавий боғча очмоқчи бўлган фуқарога санитария талабларига мувофиқлик бўйича рухсатнома тайёрлатиб бериш учун 1,5 миллион сўм, шунингдек, ёнғин хавфсизлиги хулосасини олиб бериш эвазига 200 АҚШ доллари талаб қилган. У пул маблағларини олган вақтида ушланган.

Тадбир давомида мазкур 200 АҚШ долларини олган вақтида туман Фавқулодда вазиятлар бўлими катта инспектори ҳам қўлга тушган.

Шу каби ҳолат Қорақалпоғистон Республикасида ҳам аниқланган. Чимбой туманида яшовчи аёл Кегейли тумани фуқаросига ёшга доир нафақа тайинлашда иш стажини сунъий равишда ошириб беришни ваъда қилиб, 7 миллион сўм олган вақтида ушланган.

Тергов маълумотларига кўра, у бу ишни Қорақалпоғистон Республикаси Камбағалликни қисқартириш ва бандлик вазирлигида масъул лавозимда ишловчи ўғли орқали амалга оширишни режалаштирган.

Ҳозирда мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.