Қайд этилишича, май ойи бошида Атлантика океанида ҳаракатланган халқаро кемалардан бирида хантавирус аниқлангани рост. Жаҳон соғлиқни сақлаш ташкилоти бу ҳолатга Жанубий Америкага хос бўлган «Андес» штамми сабаб бўлганини тасдиқлаган.

Мутахассисларга кўра, мазкур штамм одамдан одамга юқиши мумкин, аммо бу фақат жуда яқин ва узоқ муддатли мулоқот шароитида содир бўлади. Вирус COVID-19 ёки грипп каби ҳаво орқали тез тарқалиш хусусиятига эга эмас.

Шу сабабли халқаро экспертлар янги глобал пандемия хавфини жуда паст деб баҳоламоқда.

Фанлар академияси маълум қилишича, Ўзбекистонда одамдан одамга юқувчи «Андес» штамми ҳеч қачон қайд этилмаган.

Шунингдек, мамлакат ҳудудида учрайдиган хантавируслар инсонлар ўртасида юқмайди. Инфекция асосан ёввойи кемирувчилар орқали, уларнинг чиқиндилари аралашган чанг ёки нотўғри сақланган озиқ-овқат маҳсулотлари орқали юқиши мумкин.

Фанлар академияси олимлари ва Соғлиқни сақлаш вазирлиги томонидан табиий ўчоқлар доимий назорат қилиб борилмоқда ва ҳозирги вазият барқарор деб баҳоланмоқда.

Олимлар аҳолига ваҳимага берилмасдан, оддий гигиена қоидаларига амал қилишни тавсия қилди. Хусусан, узоқ вақт ёпиқ турган хона ва ертўлаларни тозалашда ниқоб тақиш, чанг кўтармаслик учун намлаб тозалаш ҳамда озиқ-овқатларни ёпиқ жойларда сақлаш кераклиги таъкидланди.