Об-ҳавонинг совиши муносабати билан энергетика тизими ташкилотлари электр ва газ таъминоти барқарорлигини таъминлаш чораларини кўрмоқда. Тошкент ва бошқа ҳудудларда иситиш мавсумини бошлаш ишлари олиб борилмоқда.
Энергетика вазирлиги маълумотига кўра, газ таъминотида хонадонлар, мактаблар, боғчалар, шифохоналар ва бошқа ижтимоий объектларга устуворлик берилади.
Зарур ҳолларда мавсумий истеъмолчилар, жумладан, автомобилларга газ қуйиш компрессор шохобчалари фаолияти вақтинча чекланиши мумкин. Бундай чекловлар ҳокимликлар билан келишилган тасдиқланган графиклар асосида жорий этилади. Истеъмолчилар бу ҳақда олдиндан хабардор қилинади.
Газ ва электр таъминотида муаммо юзага келса, қуйидаги рақамларга мурожаат қилиш мумкин:
1104 — газ босими ва таъминоти;
104 — газ авария хизмати;
1154 — электр узилишлари ва тармоқ носозликлари.
Ноқонуний уланиш ёки энергия ресурсларидан ноқонуний фойдаланиш ҳолатлари ҳақида «Ўзэнергоинспекция»нинг +998 71 208-10-15 рақамига хабар бериш мумкин.
Мутахассислар хавфсизлик қоидаларига риоя қилишни ҳам эслатмоқда. Хусусан:
иситиш ва газ жиҳозлари, мўри ҳамда шамоллатиш йўлларининг созлигини текшириш;
носоз жиҳозлардан фойдаланмаслик;
газ плитаси ёрдамида хонани иситмаслик;
электр симлари ва розеткаларга ортиқча юклама бермаслик;
иситиш жиҳозларини ёқилган ҳолда назоратсиз қолдирмаслик лозим.
Шунингдек, электр энергиясини тежаш, кераксиз жиҳозларни ўчириш ва иситиш воситаларидан меъёрида фойдаланиш тавсия этилади. Бу нафақат оилавий харажатларни камайтириш, балки электр тармоқларидаги юкламани пасайтиришга ҳам хизмат қилади.
