Бу ҳақда Ташқи ишлар вазирлиги матбуот хизмати маълум қилди.
Қайд этилишича, Ташқи ишлар вазирлиги ва Ўзбекистоннинг Қоҳирадаги элчихонаси томонидан Миср томони билан тўғридан-тўғри музокаралар олиб борилган. Уларнинг натижасида Ўзбекистон фуқароларининг Мисрга кириш тартибини қатъийлаштириш бўйича аввал қабул қилинган қарорни қайта кўриб чиқиш юзасидан келишувга эришилган.
Шу тариқа, янги қоидалар кучга киргунига қадар Ўзбекистон фуқаролари Мисрга амалдаги тартиб асосида саёҳат қилишлари мумкин.
Ташқи ишлар вазирлиги хорижий ҳамкорлар билан фуқароларнинг чет элга сафар қилиш имкониятларини кенгайтириш, визасиз режимларни жорий этиш ва бошқа давлатлар билан сафар тартиб-таомилларини соддалаштириш бўйича ишларни давом эттирмоқда.
Шу билан бирга, вазирлик фуқароларни хорижга сафар қилиш чоғида маҳаллий қонунчилик ва белгиланган тартиб-қоидаларга риоя этишга, виза ва миграция талабларини бажаришга, шунингдек, борилаётган мамлакатнинг миллий қадриятлари, анъаналари ва жамоат тартибини ҳурмат қилишга чақирди.
Вазирлик таъкидлашича, фуқароларнинг хорижда масъулиятли хулқ-атвор намоён этиши Ўзбекистоннинг ижобий имижини мустаҳкамлаш ва халқаро ҳамкорликни ривожлантиришга хизмат қилади.
