Ташқи ишлар вазирлиги тақдим этган расмий маълумотга кўра, ҳужжат муқаддима ва 14 та моддадан иборат бўлиб, икки давлат фуқароларига амал қилиш муддати камида олти ой бўлган хорижга чиқиш биометрик паспорти асосида ўзаро визасиз кириш, транзит ўтиш ва чиқиш ҳуқуқини беради.

Битимга мувофиқ, фуқаролар ҳар бир сафар давомида 30 кунгача, бир календарь йили мобайнида эса жами 180 кундан ошмаган муддатда визасиз бўлиши мумкин.

Шу билан бирга, визасиз режим доимий яшаш, ўқиш ёки меҳнат рухсатномасини талаб қиладиган фаолият турларига татбиқ этилмайди. Белгиланган муддатдан ортиқ қолиш учун қабул қилувчи давлат қонунчилигига мувофиқ виза олиш талаб этилади.

Ҳужжатда форс-мажор ҳолатларида бўлиш муддатини бепул узайтириш, паспорт йўқолган ёки шикастланган тақдирда вақтинчалик йўл ҳужжати бериш ҳамда мамлакатдан визасиз чиқиб кетиш тартиби ҳам назарда тутилган.

Бундан ташқари, ҳар икки давлат ўз ҳудудига киришни рад этиш ёки шахснинг бўлиш муддатини қисқартириш ҳуқуқини сақлаб қолади.

Битим имзоланган кундан бошлаб эмас, балки икки томон уни кучга киритиш учун зарур бўлган ички тартиб-таомилларни бажаргани ҳақидаги сўнгги расмий хабарномани олган санадан 30 кун ўтгач кучга киради.

Қайд этилишича, мазкур келишув Ўзбекистон ва Ўмон фуқароларининг ўзаро сафарларини енгиллаштириш, туризм, ишбилармонлик ва маданий-гуманитар алоқаларни ривожлантиришга хизмат қилади.