Бу ҳақда Ўзбекистон Журналистлар уюшмаси Ахборот хизмати маълум қилди.
Қайд этилишича, жорий йил 3 июнь куни ўтказилган «Лойиҳалар куни» тақдимот тадбирида блогерларнинг касбий салоҳиятини ошириш, медиа саводхонлигини ривожлантириш, ёш блогерлар авлодини шакллантириш ҳамда иқтидорли контент яратувчиларни қўллаб-қувватлаш мақсадида Блогерлар ижодий кенгашини ташкил этиш ташаббуси илгари сурилган эди.
Кенгашнинг биринчи тадбири доирасида блогерлар, медиа экспертлар, журналистлар ва соҳа мутахассислари иштирокида муҳокамалар ўтказилди. Унда Кенгаш фаолиятининг устувор йўналишлари бўйича таклиф ва мулоҳазалар билдирилди.
Блогерлар ижодий кенгашининг ташкил этилиши Ўзбекистон Журналистлар уюшмасининг замонавий медиа маконида масъулиятли контент яратиш, соҳа вакилларининг касбий ривожланишини қўллаб-қувватлаш ҳамда очиқ ва конструктив мулоқот майдонини шакллантиришга қаратилган изчил фаолиятининг навбатдаги муҳим босқичи ҳисобланади.
