Бу ҳақда Мактабгача ва мактаб таълими вазири Эъзозхон Каримова маълум қилди.
Унинг сўзларига кўра, мазкур ташаббус юзасидан парламент депутатлари ва сенаторлар билан дастлабки муҳокамалар ўтказилган. Энди қонун лойиҳасини ишлаб чиқиш ва уни жамоатчилик муҳокамасига қўйиш режалаштирилмоқда.
«Биз ҳам ҳозир ушбу масалани ўйлаяпмиз. Бу бўйича депутатларимиз ва сенаторларимиз билан ҳам гаплашдик. Қонун лойиҳасини ишлаб чиқиб, жамоатчилик муҳокамасига қўймоқчимиз. Бу тартиб бизда ҳам бўлиши керак, деб ўйлайман», — деди вазир.
Эъзозхон Каримова ҳозирги рақамли даврда болаларни телефондан тўлиқ воз кечтиришнинг имкони йўқлигини, аммо ундан тўғри ва меъёр асосида фойдаланиш маданиятини шакллантириш муҳимлигини таъкидлади.
Унинг қайд этишича, мактабларда ўқувчиларнинг дарс жараёнида телефондан фойдаланишига оид тартиблар ва одоб-ахлоқ қоидалари мавжуд. Бироқ уларнинг ижроси ҳамма жойда бир хил таъминланмаётгани боис, 16 ёшгача бўлган болаларнинг ижтимоий тармоқлардан фойдаланишини қонун йўли билан чеклаш имконияти кўриб чиқилмоқда.
