Иқтисодий тадқиқотлар ва ислоҳотлар маркази маълумотларига
кўра, енгил автомобиллар савдоси август ойида 62,5 мингтани ташкил этиб, бир
ойда 2,2 фоизга ошган.
Янги машиналар савдоси ошди, ишлатилган автомобилларга талаб
пасайди
Август ойида янги енгил автомобиллар савдоси 20,5 фоизга ошиб,
30,6 мингтага етди.
Бунда асосий ўсиш маҳаллий ишлаб чиқарилган автомобиллар
ҳисобига тўғри келди. Уларнинг савдоси қарийб 25 фоизга ошиб, 25,3 мингтани
ташкил этди.
Хорижда ишлаб чиқарилган янги автомобиллар савдоси ҳам 7 фоизга
ўсиб, 5,3 мингтани ташкил қилди.
Шу билан бирга, иккиламчи бозорда фаоллик пасайган. Август
ойида фойдаланилган енгил автомобиллар савдоси 10,8 фоизга камайиб, қарийб 32
мингтани ташкил этди.
Қайси ҳудудларда автомобиль савдоси кўпроқ ошди?
Бир ой давомида автотранспорт воситалари савдоси
республикадаги 14 та ҳудуднинг 9 тасида ўсган.
Энг юқори ўсиш Бухоро вилоятида — 19,1 фоиз, Тошкент вилоятида
— 11,9 фоиз ва Хоразм вилоятида — 10,8 фоиз қайд этилди.
Аксинча, автомобиль савдосидаги энг катта пасайиш Тошкент
шаҳрида кузатилиб, кўрсаткич 10,1 фоизга камайган. Андижон вилоятида пасайиш
2,7 фоизни, Фарғона вилоятида эса 2,1 фоизни ташкил этди.
Электромобиллар савдоси бир йилда 44,5 фоизга ошди
Август ойида бирламчи ва иккиламчи бозорларда 9,2 мингта
электромобиль сотилди. Бу июль ойидаги кўрсаткич билан деярли бир хил.
Электромобиллар савдосида Тошкент шаҳри етакчилик қилмоқда.
Август ойида пойтахтда 6,3 мингта электромобиль сотилган.
Кейинги ўринларда Фарғона вилояти — 662 та ва Тошкент вилояти
— 455 та кўрсаткич билан қайд этилган.
Электромобиллар савдосининг 68,5 фоизи Тошкент шаҳри ҳиссасига
тўғри келган.
Эътиборлиси, йиллик ҳисобда электромобиллар бозорида сезиларли
ўсиш кузатилган. Август ойида электромобиллар савдоси ўтган йилнинг шу даврига
нисбатан 44,5 фоизга ошган.
