Бу ҳақда Қишлоқ хўжалиги вазирлиги маълум қилди.
Сўнгги йилларда пахта ҳосилдорлиги гектарига 21 центнердан 56 центнерга етди. Жорий йилда қарийб 400 минг гектар майдонда ўртача ҳосилдорлик 70 центнерни ташкил этди. Қарийб 70 минг гектар ернинг ҳар гектаридан эса 100–110 центнергача ҳосил олинди.
Қайд этилишича, бундай натижага эришишда илм-фан ва ишлаб чиқариш интеграциясининг кучайтирилиши, олимларнинг илмий ишланмалари ва тавсияларининг бевосита далаларга татбиқ этилиши муҳим ўрин тутган. Шунингдек, серҳосил, маҳаллий тупроқ-иқлим шароитларига мос навлар ва замонавий агротехнологиялардан фойдаланиш кенгайган.
Экиш ва парваришлаш технологиялари такомиллаштирилиб, илғор агротехник усуллар жорий этилган. Сув тежовчи технологиялар ҳисобига пахтачиликда сув сарфи 1990-йилларга нисбатан икки баробар камайган.
Жорий мавсумда етиштирилган пахта ҳосилининг 85 фоизи 3 мингдан ортиқ замонавий пахта териш машинаси ёрдамида 30–35 кун ичида йиғиб олинган. Жиззах ва Сирдарё вилоятларида механизациялашган терим даражаси 100 фоизга етган.
Маълумотларга кўра, жорий йилда фермер хўжаликлари пахта етиштиришдан 13–14 триллион сўм соф фойда олиши кутилмоқда.
Келгуси йилда пахта ҳосилдорлигини ўртача 65–70 центнерга етказиш мақсад қилинган. Бунинг учун серҳосил навлар, агродронлар, сув ва энергия тежовчи технологиялар ҳамда сунъий интеллект имкониятларидан фойдаланиш кўзда тутилган.
