Маълум қилинишича, Рақамли технологиялар вазирлиги ва Google ҳамкорлигида Google’нинг халқаро верификация бўйича ҳамкор платформаси SheerID Ўзбекистонни расман қўллаб-қувватланадиган давлатлар рўйхатига киритган.
Бу орқали талабалар Google верификациясидан ўтиб, бир йиллик Google Gemini AI Plus обунасини бепул расмийлаштиришлари мумкин.
Google Gemini AI Plus обунаси сунъий интеллектдан ўқиш, тадқиқот ва ижодий лойиҳаларда фойдаланиш учун қатор имкониятларни тақдим этади.
Жумладан:
Gemini: фойдаланиш лимитлари оширилади ва илғор Flash Thinking моделига кириш имконияти берилади.
400 ГБ булутли хотира: Google Photos, Google Drive ва Gmail хизматлари учун умумий хотира тақдим этилади.
Google Flow: сунъий интеллект ёрдамида кинематографик саҳналар ва ҳикоялар яратиш имконияти.
Gmail’да Gemini: электрон почта хизмати ичида сунъий интеллектдан бевосита фойдаланиш.
Gemini Notebook: аудио ва видео материалларни қисқача баён қилиш, тестлар тайёрлаш ва тадқиқотларга ёрдам берувчи функциялардан фойдаланиш.
Сунъий интеллект асосидаги мусиқа студияси: мусиқа яратишга мўлжалланган воситалардан фойдаланиш.
Талабалар Google верификациясидан ўтиш учун Aileaders.uz платформаси орқали мурожаат қилишлари мумкин.
Шунингдек, платформада жаҳоннинг етакчи компанияларига тегишли сунъий интеллект бўйича 100 дан ортиқ халқаро курсларни бепул ўрганиш имконияти ҳам таклиф этилмоқда.
Сунъий интеллект соҳасида ўз лойиҳаларини ишлаб чиқишни истаганлар эса Startupbase.uz платформаси орқали стартап ташаббусларини ривожлантириш имкониятлари билан танишишлари мумкин.
