Бу ҳақда Миграция агентлиги маълум қилди.
Қайд этилишича, Миграция агентлиги, Ташқи ишлар вазирлиги ҳамда Ўзбекистоннинг Франциядаги элчихонаси масъулларидан иборат делегация Францияда қатор муҳим учрашувлар ўтказди.
Музокаралар натижасида FNSEA — Франция Қишлоқ хўжалиги ишлаб чиқарувчилари федерацияси билан узумзорларда мавсумий ишларга ўзбекистонликларни жалб қилиш бўйича келишувга эришилди.
Шунингдек, Sélect Recruiting Service компанияси билан номзодларни саралаш ва ишга жойлаштириш бўйича битим имзоланди. Бу ҳамкорлик орқали фуқароларни танлаш ва ишга жойлаштириш жараёнларини халқаро талаблар асосида ташкил этиш кўзда тутилган.
Таълим ва иш интеграцияси йўналишида CFA AC Paris билан “таълим + иш” форматида ҳамкорлик йўлга қўйилди. Унга кўра, Францияда ресторан соҳасида ўқиш ва бир вақтнинг ўзида ишлаш имконини берувчи махсус дастур ишлаб чиқилиши режалаштирилмоқда.
Шу билан бирга, келишувларни амалга ошириш ва ташкилий-ҳуқуқий масалаларни мувофиқлаштириш мақсадида Франциянинг ташқи ишлар, ички ишлар ва таълим идоралари ҳамда France Travail давлат бандлик хизмати, CCI Île-de-France савдо-саноат палатаси ва AP-HP каби ташкилотлар билан ҳам самарали музокаралар олиб борилди.
Мазкур келишувлар ўзбекистонликлар учун хорижда қонуний, хавфсиз ва тизимли меҳнат фаолиятини йўлга қўйиш, шунингдек, янги иш ўринлари имкониятларини кенгайтиришга хизмат қилади.
