Бу ҳақда «Дунё» АА хабар берди.
Учрашувда Сурия ташқи ишлар вазири Марказий Осиё мамлакатлари, хусусан, Ўзбекистон билан муносабатларни ривожлантиришга катта аҳамият қаратишини таъкидлади.
Томонлар сўнгги пайтларда Ўзбекистон–Сурия муносабатлари фаоллашганини қайд этиб, сиёсий мулоқотни мустаҳкамлаш ва савдо-иқтисодий ҳамкорликни кенгайтиришдан манфаатдор эканини билдирди.
Суҳбатда икки томонлама ҳамкорликнинг устувор йўналишлари муҳокама қилинди. Жумладан, Савдо-иқтисодий ҳамкорлик бўйича Ўзбекистон–Сурия ҳукуматлараро қўмитасини тузиш, икки мамлакат ташқи ишлар вазирликлари ўртасида сиёсий маслаҳатлашувлар механизмини шакллантириш ҳамда бошқа қўшма тадбирларни амалга ошириш масалалари кўриб чиқилди.
Асад аш-Шайбоний Ўзбекистон билан ўзаро манфаатли соҳаларда ҳамкорликни изчил ривожлантириш муҳимлигини таъкидлади. Сурия томони ўтган йилларда Ўзбекистон томонидан кўрсатилган ёрдам ва кўмакни юксак қадрлашини билдирди.
Сурия томони муносабатларни янада фаоллаштиришга тайёрлигини маълум қилиб, Ўзбекистон томонидан илгари сурилаётган ҳамкорлик таклиф ва ташаббусларини кўриб чиқиш ҳамда уларни амалга оширишга кўмаклашишга тайёр эканини билдирди.
Учрашув якунида томонлар сиёсий мулоқот, олий ва юқори даражадаги ўзаро ташрифлар, савдо-иқтисодий ҳамкорлик ва бошқа ўзаро манфаатли йўналишларда Ўзбекистон–Сурия муносабатларини янада ривожлантиришга тайёрлигини тасдиқлади.
