Ташкилот маълумотларига кўра, сўнгги тўрт йил ичида Европа минтақасида иссиқ ҳаво тўлқинлари оқибатида 200 мингдан ортиқ одам вафот этган. Энг юқори ўлим кўрсаткичлари Италия, Испания, Германия ва Грецияда қайд этилган.
ЖССТнинг Европа минтақавий бюроси томонидан ишлаб чиқилган янги кўрсатмаларда давлат идоралари ва аҳоли учун жазирама иссиқнинг салбий оқибатларини камайтиришга қаратилган комплекс чора-тадбирлар баён этилган.
Ташкилот аҳолига қуйидаги тавсияларга амал қилишни маслаҳат бермоқда:
- Уйни салқин сақлаш. Кечаси ва эрталаб ҳаво салқин пайтда хоналарни шамоллатиш, кундузи эса, айниқса, қуёш тушадиган томондаги дераза ва пардаларни ёпиқ сақлаш.
- Сувсизланишнинг олдини олиш. Кун давомида чанқоқ сезилмаса ҳам етарли миқдорда, асосан сув ичиш.
- Тўғри кийиниш. Табиий матодан тикилган енгил ва кенг кийимлар кийиш, ташқарига чиққанда бош кийим ва қуёшдан ҳимоя воситаларидан фойдаланиш.
- Кун тартибини мослаштириш. Энг иссиқ вақтларда — одатда соат 11:00 дан 17:00 гача — очиқ ҳавода бўлмаслик ва оғир жисмоний меҳнатдан сақланиш.
Шунингдек, ҳужжатда иссиқ ҳаво ҳақида эрта огоҳлантириш тизимларини такомиллаштириш, айниқса, хавф гуруҳига кирувчи аҳолини ўз вақтида хабардор қилиш муҳимлиги қайд этилган.
ЖССТ иссиқхона газлари чиқиндиларини қисқартириш, шаҳарларда яшил ҳудудлар майдонини кенгайтириш, парклар барпо этиш, дарахт экиш, дарёлар, ўрмонлар ва ботқоқликларни асраб қолишни ҳам тавсия этмоқда. Бу чоралар аҳоли яшаш ҳудудларида ҳароратни пасайтиришга хизмат қилиши таъкидланган.
Ташкилот, айниқса, 65 ёшдан ошганлар ҳамда сурункали касалликларга чалинган фуқаролар жазирама иссиқ кунларида алоҳида эҳтиёткор бўлишлари зарурлигини эслатди.
