Бу Вазирлар Маҳкамасининг 2026 йил 29 октябрда қабул қилинган 596-сон қарорида белгиланган.
Қарорга кўра, йўл ҳаракати қоидаларини бузиш ҳолатларини қайд этувчи махсус автоматлаштирилган тизимлар ҳайдовчиларнинг транспорт воситасини бошқариш ва йўловчиларни ташишда хавфсизлик камаридан фойдаланиш қоидаларига риоя этмаслигини ҳам аниқлаши мумкин.
Янги тартибга кўра, қоидабузарликни қайд этувчи тизимлар аниқланган ҳолатлар ҳақидаги маълумотларни «Маъмурий амалиёт» модулига автоматик равишда узатиш имкониятига эга бўлиши керак.
Бунда қуйидаги маълумотлар узатилади:
Метрологик қиёслаш гувоҳномасининг рақами ва амал қилиш муддати;
Қоидабузарлик содир этилган сана ва вақт;
Қоидабузарлик аниқланган жойнинг координаталари.
Шунингдек, электр энергияси узилган тақдирда, тизим камида 8 соат давомида ишлашини таъминлайдиган захира электр манбаи билан жиҳозланган бўлиши лозим.
Қоидабузарликни қайд этиш жараёнида олинган фотосуратлар юқори сифатли бўлиши керак.
Уларда ҳайдовчининг юз кўриниши ва хавфсизлик камаридан фойдаланган ёки фойдаланмаганлиги аниқ акс этиши талаб қилинади.
Қарор билан Вазирлар Маҳкамасининг 2021 йил 21 апрелдаги 232-сон қарорига тегишли ўзгартириш ва қўшимчалар киритилди.
