28 октябрь куни Маттала Ражапакса халқаро аэропортида Тошкентдан келган илк парвоз 160 нафар йўловчи билан кутиб олинди. Биринчи самолёт халқаро авиация анъаналарига мувофиқ сув аркаси орқали кутиб олинди ва расмий маросим ташкил этилди.
Янги авиақатнов Ўзбекистоннинг Жанубий Осиё билан транспорт алоқаларини кенгайтириш, икки давлат ўртасида савдо, инвестиция ва туризм имкониятларини оширишга хизмат қилиши кутилмоқда.
Шунингдек, мазкур йўналиш Шри-Ланка ва Марказий Осиё мамлакатлари ўртасида Ўзбекистон орқали қулай авиақатновларни таъминлаш имконини беради.
«Тошкент–Маттала–Тошкент» йўналиши бўйича тўғридан-тўғри рейслар 2027 йил март ойи охирига қадар ҳафтасига икки марта — чоршанба ва шанба кунлари амалга оширилади.
Янги йўналишнинг очилиши Ўзбекистон ва Шри-Ланка ўртасидаги алоқаларни мустаҳкамлаш, сайёҳлар оқимини кўпайтириш ҳамда икки мамлакат ўртасидаги ҳамкорликни ривожлантиришда муҳим қадам бўлиши мумкин.
