Мазкур матбуот анжуманини ўтказишдан кўзланган асосий мақсад – аҳолига ҳуқуқий ахборот етказиш соҳасида амалга оширилаётган ишлар натижаларини кенг жамоатчиликка етказиш, бу борадаги очиқлик ва шаффофликни таъминлаш ҳамда фуқароларнинг ҳуқуқий саводхонлигини янада оширишдан иборат.
Тадбирда лойиҳалар ҳақида кенг жамоатчиликка батафсил маълумотлар берилди. Унда:
Қонунчилик маълумотлари миллий базасининг фаолияти, бугунги кунда Lex.uz сайтининг дунё бўйлаб кенг қамрови, норматив ҳужжатларнинг янгиланиши, платформага ўзбек тилида ҳужжатлар жойлаштирилгани билан боғлиқ муҳим маълумотлар тақдим этилди.
Шунингдек, қонунчиликдаги янгиликлар, ҳуқуқий ислоҳотлар ҳақида тезкор маълумотлар тақдим этувчи “Ҳуқуқий ахборот” расмий телеграм канали фаолияти ҳамда ҳуқуқий ахборотни етказишдаги бошқа инновацион лойиҳалар, расмий, юридик ва бошқа нашрлар ҳамда ҳуқуқий ҳужжатлар лойиҳаларини тайёрлаш ишлари;
Болалар ва ёшларнинг ҳуқуқий билимларини ошириш мақсадида тайёрланган 14 та ўйин лойиҳалари ва аҳолига ҳуқуқий ахборотни медиа маҳсулотлари орқали тарқатиш усуллари;
расмий, юридик ва бошқа нашрлар ҳамда ҳуқуқий ҳужжатлар лойиҳаларини тайёрлаш ва маркетинг йўналишида олиб борилган самарали ишлар;
“Инсон ва Қонун” газетаси ҳамда “Ҳуқуқ ва Бурч” журнали бирлашган таҳририятининг фаолиятига оид маълумотлар;
қонунчилик ҳужжатлари билан чет тилларида танишиш имкониятини яратиш, хорижий алоқалар соҳаларини ислоҳ қилиш юзасидан амалга оширилган ишлар ҳамда рақамлаштириш йўналиши доирасида Lex.uz да ҳужжатлар билан ишлаш ва улар билан танишишда сезиларли қулайликлар яратилганлиги, хусусан, ҳуқуқ соҳасида сунъий интеллект хизматини тақдим этувчи “LехАI” платформаси ишга туширилганлиги, ушбу платформада ҳуқуқий масалаларга жавоб берадиган ёрдамчи чат-бот жорий этилганига оид маълумотлар берилди.
Шунингдек, замонавий рақамли хизматлар ва ахборот тизимларини ривожлантириш борасидаги янгиликлар тақдим этилди, мавжуд муаммолар муҳокама қилинди.
