Бунга қадар барча соҳа, жумладан, бюджет соҳасида коррупцияни келтириб чиқарувчи омилларнинг олдини олиш ва профилактика чораларига оид кўплаб масалалар эътибордан четда қолган эди. Кейинги йилларда мамлакатимизда коррупцияга қарши курашиш, жамиятда коррупцияга нисбатан муросасиз муносабатни шакллантириш борасида кенг кўламли ишлар қилинмоқда.
Жумладан, давлат бошқарувида самарали ва таъсирчан жамоатчилик назоратини амалга ошириш учун зарур шарт-шароит яратилиб, коррупцияга оид ҳуқуқбузарликлар содир этилишининг олдини олишга қаратилган тизим шакллантирилди.
Давлатимиз раҳбари 2025 йил 5 март куни коррупциянинг олдини олиш бўйича ишлар натижадорлиги ва келгусидаги устувор вазифаларга бағишланган кенгайтирилган йиғилишда 55 та аниқ мақсадга йўналтирилган ташаббусни илгари сурди. Бу Ўзбекистонда коррупцияга қарши курашиш сиёсатининг янги векторларини белгилаб берди. Коррупцияга қарши курашишда парламент, миллий ва ҳудудий кенгашлар, фуқаролик жамияти институтларининг роли оширилишига оид вазифалар белгиланди.
Мамлакатимизда яширин иқтисодиёт ва коррупцияга қарши курашиш борасидаги қатъий саъй-ҳаракатлар натижасида кейинги тўққиз йилда ялпи ички маҳсулотимиз ҳажми 2,5 карра ошиб, 2025 йили 145 миллиард долларга, экспорт қиймати 43 миллиард долларга етди. “Ўзбекистон — 2030” стратегиясида 2026 йил якуни билан ялпи ички маҳсулот ҳажмини 167 миллиард долларга етказиш режалаштирилган. Жорий йилнинг ўтган давридаги иқтисодий ўсиш суръати эса бу кўрсаткични йил якунига қадар 180 миллиард долларга етказиш имконини бермоқда. 2030 йилга бориб эса 240 миллиард долларга етиши марра қилиб олинган. Бу 2030 йилга қадар иқтисодиёт ҳажмини 2 баравар ошириш ва “даромади ўртачадан юқори бўлган давлатлар” қаторига кириш дегани.
“Фавқулодда ҳолат” йилининг аҳамияти
2026 йил Ўзбекистонда коррупцияга қарши кураш бўйича “фавқулодда ҳолат” йили деб эълон қилинишига Президентимизнинг Олий Мажлис ва Ўзбекистон халқига йўллаган Мурожаатномасидаги қатъий позицияси асос бўлди. Жумладан, давлатимиз раҳбари “Коррупция — давлат тараққиётига тўсиқ бўладиган, адолат ва қонун устуворлигини издан чиқарадиган, жамиятда ишонч муҳитини заифлаштирадиган энг жиддий таҳдид. Коррупцияга йўл қўйиш эса ислоҳотларимизга хиёнатдир!
Бу иллатга қарши курашиш бўйича 2026 йилда “фавқулодда ҳолат” эълон қиламиз”, деди.
“Фавқулодда ҳолат” эълон қилинишининг асосий сабаби — коррупциянинг давлат тараққиётига тўсиқ бўлаётгани, адолат ва қонун устуворлигини издан чиқараётгани ҳамда жамиятда ишонч муҳитини заифлаштираётган энг жиддий таҳдид эканидир. Бу — жамият хавфсизлиги, инсон ҳуқуқларини ҳимоя қилиш, давлатнинг конституциявий тузумини сақлаб қолиш ҳамда иқтисодий ва молиявий хавфсизликни таъминлаш мақсадида тизимли чоралар кўриладиган ўта муҳим сиёсий ва ҳуқуқий жараён. Мамлакат қонунчилиги ва давлат сиёсати доирасида ушбу тушунча ҳам ҳуқуқий, ҳам рамзий-ижтимоий маънода давлат ва жамият учун стратегик аҳамиятга эга. Зеро, коррупция ва адолатсизликка қарши эълон қилинган фавқулодда чоралар жамиятда давлат идоралари ва суд тизимига ишонч муҳитини тиклашга хизмат қилмоқда.
Ушбу сиёсий қадам соҳада фақат жазо чоралари билан чекланмай, бу иллатнинг олдини олишда мутлақо янги институционал механизмларни ишга солди.
“Фавқулодда ҳолат” деганда фақат жазо ёки текширувлар кўпайишини тушуниш хато. Агар қарорлар очиқ бўлса, жараёнлар рақамлаштирилса, назорат жамоатчилик иштирокида амалга оширилса, порахўрликка эҳтиёж ҳам, имконият ҳам кескин қисқаради. Коррупцияга қарши курашиш масаласи, энг аввало, онг, виждон ва эътиқоддаги барқарорлик масаласидир. Бу фикр коррупцияга қарши курашнинг энг муҳим ва энг чуқур жиҳатини — унинг маънавий-маърифий асосини ифодалайди. Қонунлар, жазо чоралари ва назорат тизимлари муҳим, аммо инсоннинг ички дунёси ўзгармаса, коррупцияни бутунлай йўқ қилиб бўлмайди.
Коррупцияга қарши курашиш бўйича вазирлик ва идоралар раҳбарларининг шахсий масъулияти ҳамда жавобгарлиги оширилди. Масъулиятсизликка йўл қўйган раҳбарларга нисбатан чоралар кескин тус олмоқда.
Айни йўналишда ишлаётган мутахассислар сони дунёда миллиондан ошиб кетган ва уларнинг фаолияти давлат бюджетига жуда қимматга тушаётган бир пайтда коррупция ўсишда давом этмоқда. Бу эса “коррупция — енгилмас, унга қарши курашиш бефойда” деган дунёқараш ва нигилистик муносабат шаклланишига олиб келмоқда. Шундай вазиятда энг тўғри йўл, назаримизда, коррупцияга қарши курашиш стратегияси ва тактикасини қайта кўриб чиқишдир. Мамлакатимизда шу мақсадда “фавқулодда ҳолат” эълон қилинди. Бунда коррупцияга қарши кураш муваффақиятли кечиши учун амалдорлар дунёқарашидаги иллатларни маънавий-ахлоқий фазилатлар билан алмаштириш зарурлиги назарда тутилди.
Мансабдор дунёқарашининг асосини адолат, ҳалоллик, эзгулик, яратувчанлик, меҳр-оқибат, хуллас, одамийлик мулки ташкил этмас экан, коррупция енгилмайди. Демак, унга оддий ҳол деб эмас, балки жиноят деб қараш маданиятини шакллантириш зарур.
Энг олий ҳакам — виждон. Ташқи назорат (камералар, текширувлар) бўлмаган жойда ҳам инсонни ноқонуний ишдан фақат виждони тўхтатиб қолади. Коррупцияга қарши курашишда маънавий масъулият зарур. Шахс ўз оиласи, халқи ва Ватани олдидаги масъулиятини ҳис этса, ҳаром бойликдан ҳазар қилади. Ҳалол яшаш ва меҳнат қилиш ички эҳтиёжга айланиши керак. Моддий манфаатлар ёки қийинчиликлар қаршисида инсон ўз принципларини сотмаслиги — эътиқод белгиси. Шу сабабли коррупцияга қарши кураш фақат ҳуқуқ-тартибот органларининг иши эмас, балки боғча, мактаб ва оиладан бошланадиган тарбия ва миллий генофондни асраш масаласидир.
Ҳозир дунёда коррупциянинг зарари қарийб 3 триллион долларни ташкил этади. Президентимиз 2023 йил декабрда коррупцияга қарши курашиш соҳасида юксак халқаро мукофотни топшириш маросимидаги нутқида таъкидлаганидек, “Бу катта рақамлар ҳақиқий ҳолатни ва коррупция натижасида кўрилаётган реал зарарнинг аниқ ҳажмини тўлиқ ифода эта олмайди. Энг ёмони, жамият кўрадиган маънавий зарар кўламини ҳеч нарса билан ўлчаб бўлмайди”.
Transparency International (2026 йил 11 февраль) маълумотларига кўра, Ўзбекистоннинг Corruption Perception Index (CPI) кўрсаткичи 2025 йил якуни бўйича 124-ўринга чиқди (2016 йилда 158-ўринда бўлган). Бу мамлакатимизда коррупцияга қарши муросасиз муҳит яратилаётганидан далолат.
“Ўзбекистон — 2030” стратегиясида 2030 йилга бориб, Коррупцияни идрок этиш индексида мамлакатимиз позициясини камида 20 поғона яхшилаш мақсадли вазифаси белгиланган. Ушбу кўрсаткичга эришиш учун Ўзбекистоннинг ўрнини ҳар йили ортиб бориш тамойили асосида 4 поғонадан кўтариб бориш мақсад қилинган.
Зарурат ва тафсилот
Кўрилаётган тизимли чораларга қарамай, айрим соҳаларда коррупция ҳолати сақланиб қолаётгани унга қарши курашиш самарадорлигини ошириш, коррупцияга оид жиноятлар содир этганлик учун жавобгарлик муқаррарлигини таъминлаш, шунингдек, ёшларни коррупцияга нисбатан муросасизлик руҳида тарбиялаш заруратини юзага келтираётган эди.
Шу маънода, 2026 йил 22 июнда “Ўзбекистон Республикасининг айрим қонун ҳужжатларига коррупцияга қарши курашиш самарадорлигини оширишга, коррупцияга оид жиноятлар учун жавобгарлик муқаррарлигини таъминлашга қаратилган қўшимча ва ўзгартиришлар киритиш тўғрисида”ги қонун қабул қилинди. Зеро, ҳужжатда давлат ва жамият хавфсизлигига тўғридан тўғри таҳдид солаётган уюшган жиноятчилик, наркожиноятчилик, кибержиноятчилик, яширин иқтисодиёт билан чирмашиб кетган коррупцияга қарши таъсирчан чоралар белгиланди.
Мазкур қонун қабул қилинишининг зарурати яна шундаки, миллий ҳуқуқ тизимидаги бўшлиқларни тўлдириш ҳамда халқаро стандартларни жорий этиш талаби ва эҳтиёжи мавжуд эди.
Жумладан, биринчидан, жиноят қонунчилигида “коррупцияга оид жиноятлар”нинг аниқ ҳуқуқий таърифи ва муайян рўйхати мавжуд эмасди.
Иккинчидан, жавобгарлик муқаррарлигини таъминлаш. Коррупция содир этган шахслар учун жазо чораларининг қатъийлигини ошириш ва ҳуқуқбузарликларга чек қўйиш зарурати юзага келган эди.
Учинчидан, халқаро стандартларни имплементация қилиш масаласи. Ўзбекистоннинг коррупцияга қарши курашиш бўйича халқаро мажбуриятлари ва илғор хорижий тажрибани миллий қонунчиликка мослаштириш лозим эди.
Тўртинчидан, комплаенс (ички) назорат ва тизимни кучайтириш: давлат харидларида коррупциявий омилларни кескин камайтириш ҳамда коррупция ҳақида хабар берган шахслар хавфсизлигини кафолатлаш эҳтиёжи вужудга келганди.
Аввало, мазкур қонун коррупцияга оид жиноятлар учун жавобгарлик муқаррарлигини таъминлаш, коррупцияга қарши курашиш орқали фуқароларнинг ҳуқуқлари ва эркинликларини ҳимоя қилишга хизмат қилишини қайд этиш зарур.
Ушбу ҳужжат билан 3 та кодекс ҳамда 6 та қонунга ўзгартириш ва қўшимчалар киритилди. Жумладан, Жиноят кодексига илк бор “коррупцияга оид жиноятлар” тушунчаси киритилди ва унга 18 турдаги жиноят (жумладан, пора олиш, пора бериш ва ҳоказо) киритилиши белгиланди. Коррупция жиноятлари натижасида олинган даромадларни легаллаштириш (Жиноят кодексининг 243-моддаси) ҳам расман коррупциявий жиноят сифатида баҳоланди.
Коррупцияга оид жиноятларни содир этган шахсларнинг ягона электрон реестри юритилиши белгиланди.
Шунингдек, коррупция ҳолатлари ҳақида хабар берган шахсларнинг хавфсизлигини таъминлаш тизими кучайтирилди.
Ёшлар ўртасида коррупцияга нисбатан муросасиз муносабатни шакллантириш ёшларга оид давлат сиёсатининг асосий йўналишларидан бири этиб белгиланди.
Жазо чоралари кучайтирилди
Қонун билан коррупцияга оид жиноятлар учун жазо чоралари кескин кучайтирилди. Ҳеч қандай енгиллик бўлмайди. Энди коррупция жиноятлари учун ҳукм қилинган шахсларга нисбатан жазони ўташдан муддатидан илгари шартли равишда озод қилиш институти мутлақо қўлланмайди. Маҳкумлар тайинланган муддатни панжара ортида тўлиқ ўтайди.
Ўзлаштириш, растрата қилиш ёки фирибгарлик орқали коррупция содир этган ва етказилган зарарни тўлиқ қопламаган шахсларга нисбатан жазодан муддатидан илгари шартли равишда озод қилиш тартиби қўлланмайди.
Коррупцияга оид оғир ёки ўта оғир жиноятларни содир этганлар жавобгарликка тортиш муддати ўтиб кетгани муносабати билан жавобгарликдан озод этилмайди, яъни озодликдан маҳрум қилиш муддати узайтирилди. Фирибгарлик ва ўзлаштириш: мансаб ва хизмат мавқеини суиистеъмол қилиб фирибгарлик содир этганлик (168-модда) ёки талон-тарож қилганлик учун энг юқори жазо 8 йилдан 10 йилгача, порахўрлик учун максимал жазо: жавобгарликни оғирлаштирувчи ҳолатларда пора олиш ва бериш (210-212-моддалар) жиноятлари учун жазо чоралари 20 йилгача озодликдан маҳрум қилиш этиб белгиланган.
Жиноят кодексининг 8-бўлими “Коррупцияга оид жиноятлар” атамаси билан тўлдирилди ва унга 18 турдаги жиноий қилмишлар (иқтисодий ва мансабдорлик жиноятлари) аниқ киритилди.
Давлат харидлари тизимида бошланғич нархни асоссиз ошириш каби ҳолатлар учун ҳам жавобгарлик чоралари белгиланди. Давлат харидлари тизимида товар ёки хизматларнинг бошланғич нархини асоссиз ошириш — давлат маблағларини талон-тарож қилиш ва коррупцияга йўл очиш деб баҳоланади ҳамда қонунчиликка асосан жиддий жавобгарликка сабаб бўлади.
Яна бир янгилик, бугун давлат харидлари махсус порталида сунъий интеллект технологиялари асосида ишловчи электрон модуль фаолият юритмоқда. У товар ва хизматларнинг реал бозордаги ўртача нархини автоматик ҳисоблайди. Буюртмачи киритган бошланғич нархни бозор баҳоси билан солиштиради. Инсон омили иштирокини чеклаб, нархни асоссиз оширишга уринишларни тизимнинг ўзидаёқ тўсиб қўяди.
Комплаенс-назорат тузилмалари
Бугун барча даражада коррупцияга қарши фаол курашилаётганига қарамай, жуда секин суръат билан камайиб бормоқда. Бироқ коррупцияга қарши кураш заифлашаётгани йўқ, аксинча, бунга тижорат тузилмалари (хусусий бизнес) ҳам тобора кўпроқ жалб этилмоқда.
Ривожланган мамлакатлар амалиёти коррупцияга қарши курашишда комплаенс-назорат (compliance control) тизими таҳлили катта самарага эга эканини кўрсатади.
Янги қонун билан давлат идораларидаги комплаенс ва коррупцияга қарши ички назорат тузилмаларининг ваколатлари ва вазифалари кенгайтирилди. Жумладан, давлат органлари ва ташкилотлари:
биринчидан, тизимда коррупцияга қарши курашиш бўйича ички сиёсат юритилиши ҳамда ушбу соҳадаги фаолият мувофиқлаштирилишида бевосита иштирок этади;
иккинчидан, фаолиятида коррупция ҳолатларининг олдини олишга қаратилган самарали механизмлар ҳамда назорат тизими жорий этилишини таъминлайди;
учинчидан, тизимда қонунга риоя этиш, унга нисбатан ҳурмат руҳини мустаҳкамлаш, коррупцияга муросасиз муносабат муҳитини яратиш ва бу борада аҳолининг ижобий фикрини шакллантириш чораларини кўради;
тўртинчидан, комплаенс ва коррупцияга қарши ички назорат тузилмалари давлат органи ва ташкилоти тизимида коррупцияга қарши курашиш вазифасини амалга оширувчи, бюджет маблағлари айланмасини назорат қилувчи ҳамда шахсий хавфсизлик бўлинмаларининг фаолиятини мувофиқлаштиради;
бешинчидан, фаолиятида шаффофликни таъминлаш, аффилланганлик ҳамда манфаатлар тўқнашуви ҳолатларининг олдини олишга қаратилган коррупцияга қарши назорат тизимини амалга оширади;
олтинчидан, коррупция ҳолатларининг олдини олиш юзасидан белгиланган тартибда текширувлар ўтказилишини ҳамда қатъий жавобгарлик чоралари кўрилишини ташкил этади.
Давлат органлари ва ташкилотларининг комплаенс ва коррупцияга қарши ички назорат тузилмалари ўз зиммасига юклатилган вазифаларни амалга оширишда зарур бўлган ахборот ҳамда маълумотлар базаларидан фойдаланиш, коррупцияга оид ҳуқуқбузарликларнинг содир этилишига имкон яратувчи сабаб ҳамда шарт-шароитларни бартараф этиш чораларини кўриш, назорат тадбирларини мустақил ёки ишчи гуруҳ тузган ҳолда ташкил этиш каби қатор ҳуқуқларга эга бўлди.
Ташкилот биринчи раҳбарларининг коррупцияга оид ҳуқуқбузарликлари аломатлари аниқланганда ёки жиноий гуруҳ фаолиятига раҳнамолик қилаётган деб ҳисоблаш учун етарли асослар мавжуд бўлганда, уларнинг комплаенс ва коррупцияга қарши ички назорат бўйича ўринбосари юқори турувчи ички назорат хизмати билан келишган ҳолда тегишли ҳужжатлар ва маълумотларни ҳуқуқни муҳофаза қилувчи органларга тўғридан тўғри тақдим этиш, шунингдек, кадрлар масаласи ва молиявий харажатлар бўйича бошқарув қарорларини қабул қилиш ҳуқуқини вақтинча тўхтатиш ёки тегишли раҳбарни ёхуд ходимни вазифасини бажаришдан вақтинча четлатиш борасида таклиф киритиш ваколатига эга бўлади.
Тўрт кўз тамойили ва махсус реестр
Тўрт кўз тамойили (икки кишилик назорат) молиявий ва операцион хавфларни 60 фоиздан 80 фоизгача камайтира олади. Бу қоида муҳим қарорлар ва транзакцияларни камида икки мустақил шахс тасдиқлашини талаб қилади.
Хавфни камайтириш самарадорлигига қуйидаги ҳолларда эришилади.
Фирибгарликнинг олдини олиш: тил бириктириш эҳтимолини кескин камайтиради. Бир ходимнинг ёлғиз ўзи тизимдан маблағ ўғирлаши ёки маълумотларни ўзгартириши имконсиз бўлади.
Инсон хатоларини камайтириш: чарчоқ ёки диққатсизлик туфайли йўл қўйилган техник хатолар иккинчи назоратчи томонидан тез аниқланади.
Ички назоратни кучайтириш: ходимларда масъулият ҳиссини оширади. Ҳар бир қадам текширилишини билиш суиистеъмоллик фикридан қайтаради.
Мазкур қонун билан коррупцияга оид жиноятларни содир этишда айбдор деб топилган шахсларнинг электрон реестри юритилади. Ушбу тизим жамиятда коррупцияга нисбатан муросасизликни кучайтириш, давлат хизматига қайта ишга кириш тизимини назорат қилиш ва шаффофликни таъминлаш мақсадида ташкил этилган.
Реестр Коррупцияга қарши курашиш агентлиги томонидан Ички ишлар вазирлиги (ИИВ) билан ҳамкорликда юритилади. ИИВ суднинг айблов ҳукми қонуний кучга кирган пайтдан бошлаб 3 иш куни ичида шахс ҳақидаги маълумотларни реестрга киритади. Коррупционерлар ҳақидаги маълумотлар Жиноят кодексида белгиланган судланганлик муддати давомида реестрда сақланади.
Реестрга киритилган шахслар учун чекловлар белгиланди. Унга кўра, рўйхатга тушган фуқароларга нисбатан судланганлик муддати тугагунга қадар қуйидаги қатъий тақиқлар қўлланади:
— давлат хизматига қабул қилиниш ва давлат мукофотлари билан тақдирланиш;
— сайланадиган ҳамда алоҳида тартибда тайинланадиган лавозимларга номзод сифатида кўрсатилиш;
— давлат органлари ҳузуридаги жамоатчилик кенгашлари ва идоралараро коллегиал органларга аъзо бўлиш;
— шахс ўзи таъсис этган ёки устав фондининг 50 фоиздан ортиғига эгалик қиладиган ширкатлар билан давлат харидларида ҳамда давлат-хусусий шериклик битимларида иштирок этиш;
— давлат улуши 50 фоиздан юқори бўлган ташкилотларда ҳамда давлат таълим муассасаларида (мактаб, ОТМ ва ҳоказо) раҳбарлик лавозимларида ишлаш.
Дахлсизлик ва хавфсизлик кафолатлари
Ўзбекистонда комплаенс ва коррупцияга қарши ички назорат тузилмалари ходимларига махсус дахлсизлик ва хавфсизлик кафолатлари берилишининг асосий сабаби уларнинг ўз ташкилотидаги юқори лавозимли мансабдор шахслар ва биринчи раҳбарларнинг босими ёки таъқибларидан қўрқмай, мустақил ва холис фаолият юритишини таъминлашдир.
Комплаенс ва коррупцияга қарши ички назорат тузилмалари бевосита ўзи ишлаётган тизимдаги қонунбузарликларни фош этиши сабабли уларни маъмурий ва жисмоний хавф-хатарлардан ҳимоя қилиш зарур эди.
Нега айнан махсус кафолатлар зарур эди деган савол туғилади.
Биринчидан, ички таъсир ва босимни чеклаш, яъни назорат қилинаётган раҳбарлар томонидан комплаенс ходимларини ишдан бўшатиш ёки асоссиз интизомий жазога тортиш хавфини йўқотиш. Махсус кафолатлар қўрқувсиз фаолият ва тизимли шаффофликни ҳамда назоратчиларнинг раҳбар хатоларини очиқ айтишдан қўрқмаслигини таъминлайди. Ички суриштирув натижаларини биринчи раҳбар яшира олмаслиги ва уларни юқори идораларга тақдим этиш мажбуриятини англаб етишга олиб келади.
Иккинчидан, манфаатлар тўқнашувини бартараф этиш. Ташкилотнинг биринчи раҳбарида коррупция аломатлари аниқланган тақдирда ходимнинг ҳеч қандай тўсқинликсиз тўғридан тўғри ўзидан юқори турувчи органга чиқа олишини кафолатлаш.
Учинчидан, хизмат вазифасини тўлиқ бажариш. Ходимлар хавфсизликдан хавотир олмай, давлат идоралари объектларига эркин кириши ва барча зарур ҳужжатларни талаб қила олиши учун шароит яратиш.
Тўртинчидан, давлат органлари ва ташкилотларининг комплаенс ва коррупцияга қарши ички назорат тузилмалари ходимларининг турар жойига ёки хизмат хонасига, фойдаланадиган транспортига кириш, уларни кўздан кечириш, уларда тинтув ўтказиш ёки ашёни олиш, телефондаги сўзлашувларини эшитиш, ходимларни кўздан кечириш ва шахсий тинтув қилиш, шунингдек, хат-хабарларини, уларга тегишли ашёлар ва ҳужжатларни кўздан кечириш, олиб қўйиш ёхуд олиш фақат Ўзбекистон Республикаси Бош прокурорининг ёзма рухсати билан, белгиланган тартибда амалга оширилиши мумкин.
Бешинчидан, давлат органлари ва ташкилотларининг комплаенс ва коррупцияга қарши ички назорат тузилмалари ходимини, шу жумладан, у билан меҳнат шартномаси тугатилганидан ёки хизматдан бўшатилганидан кейин икки йил ичида собиқ ходимини гувоҳ ёки гумон қилинувчи сифатида сўроқ қилишга, уларга нисбатан қамоққа олиш тарзидаги эҳтиёт чорасини қўллашга ва ушлаб туришга Ўзбекистон Республикаси Бош прокурори хабардор этилган ҳолда, белгиланган тартибда йўл қўйилади.
Олтинчидан, давлат органлари ва ташкилотларининг комплаенс ва коррупцияга қарши ички назорат тузилмалари ходимларига нисбатан жиноят иши фақат Ўзбекистон Республикаси Бош прокурори томонидан қўзғатилиши мумкин.
Давлат органлари ва ташкилотларининг комплаенс ва коррупцияга қарши ички назорат тузилмалари ташкилот биринчи раҳбарларига нисбатан таъсирчан ваколатга эга бўлди, тизимда ҳақиқий мустақиллик ва тийиб туриш механизми йўлга қўйилади. Бу ўз навбатида, юқори бўғин коррупциясига қарши курашиш самарадорлигини ошириш билан бирга халқаро стандартлар талабларини тўлиқ бажариш ҳамда халқаро ташкилотлар ва инвесторлар олдида давлат идорасининг нуфузини оширишга хизмат қилади.
Шариф ҚОБИЛОВ,
ИИВ Академияси профессори,
истеъфодаги полковник
