Санэпидқўмита Ахборот хизмати томонидан тақдим этилган эмлаш тақвимига кўра:
- 1 суткаликда — VGB-1: вирусли гепатит Bга қарши.
- 2–5 кунликда — БСЖ-1: сил касаллигига қарши.
- 2 ойликда — OPV-1, Rota-1, Pnevmo-1 ва Penta-1: полиомиелит, ротавирус инфекцияси, пневмококк инфекцияси, шунингдек дифтерия, кўкйўтал, қоқшол, гепатит B ва b туридаги гемофил инфекцияга қарши.
- 3 ойликда — OPV-2, Rota-2, Pnevmo-2 ва Penta-2: тегишли вакциналарнинг навбатдаги дозалари.
- 4 ойликда — OPV-3, Rota-3, Penta-3 ва IPV-1: полиомиелит ҳамда бошқа тегишли инфекцияларга қарши.
- 9 ойликда — IPV-2: полиомиелитга қарши.
- 12 ойликда — КПК-1 ва Pnevmo-3: қизамиқ, эпидемик паротит (тепки), қизилча ва пневмококк инфекциясига қарши.
- 16 ойликда — АКДС-4 ва OPV-4: дифтерия, кўкйўтал, қоқшол ва полиомиелитга қарши.
- 6 ёшда — КПК-2: қизамиқ, тепки ва қизилчага қарши.
- 7 ёшда — АДС-М-5 ва OPV-5: дифтерия, қоқшол ва полиомиелитга қарши.
- 9 ёшда — ВПЧ: одам папиллома вирусига қарши, қиз болаларга.
- 16 ёшда — АДС-М-6: дифтерия ва қоқшолга қарши.
Эслатилишича, 2, 3 ва 4 ойликда қўлланиладиган Penta битта комбинацияланган вакцина бўлиб, унинг таркибига АКДС, VGB ва XIB компонентлари киради. OPV ва Rota вакциналари оғиз орқали, қолганлари эса тегишли йўриқномага мувофиқ инъекция орқали юборилади.
Эмлашда аниқ доза ва юбориш жойи фойдаланилаётган вакцина йўриқномасига мувофиқ тиббиёт ходими томонидан белгиланади.
Мамлакатдаги эпидемиологик вазиятдан келиб чиқиб, эмлаш тақвимига қўшимчалар киритилиши мумкин. Жумладан, хабарда қайд этилишича, ҳозирги вақтда қизамиққа қарши эмлаш 6 ойликда ҳам амалга оширилмоқда.
