Бу ҳақда tolonews.com сайтида мақола эълон қилинди.
Мақолада айтилишича, муассаса Афғонистон фуқаролари учун хорижда, хусусан, Покистонда даволанишга муҳим муқобил тиббий марказга айланмоқда.
Шифохона маъмурияти маълумотига кўра, муассасада 25 та ихтисослашган бўлим ва 40 нафардан зиёд шифокор фаолият юритмоқда. Бу ерда неврология, ортопедия, урология ва бошқа йўналишлар бўйича ихтисослаштирилган тиббий хизматлар кўрсатилмоқда.
Шифохона матбуот хизмати вакили Азизбекнинг айтишича, сўнгги икки йил давомида мамлакатнинг турли ҳудудларидан 134 мингдан ортиқ бемор тиббий ёрдам учун мурожаат қилган.
Мутахассислар қайд этишича, беморларнинг аксарияти қандли диабет, қалқонсимон без касалликлари ҳамда ирсий хасталиклар билан мурожаат қилмоқда. Даволанувчиларнинг асосий қисми Афғонистоннинг шимолий вилоятларидан келади.
Беморлар эса шифохонадаги хизматлар сифатини ижобий баҳоламоқда. Уларга кўра, муассасанинг Афғонистон чегарасига яқин жойлашгани даволаниш учун сарфланадиган вақт ва харажатларни сезиларли даражада камайтирган.
Фарёб вилоятилик Нажибулла шифохонадаги хизматлар нархи аҳоли учун мақбул эканини таъкидлади. Балх вилоятилик Аҳмадулла эса илгари Покистон, Ҳиндистон ёки Эронга бориш катта харажат талаб қилган бўлса, эндиликда сифатли тиббий хизматни яқин масофада олиш имконияти пайдо бўлганини айтди.
Жузжон вилоятилик Муҳаммадхон ҳам шифохонадаги замонавий жиҳозлар, малакали шифокорлар ва даволаш натижаларини юқори баҳолаб, бундай муассасалар аҳоли учун катта енгиллик яратаётганини билдирди.
Қайд этилишича, айниқса Покистонга бориш имкониятлари чекланган ҳозирги шароитда тобора кўпроқ афғон фуқаролари ихтисослаштирилган тиббий ёрдам учун Афғон-Ўзбекистон қўшма бозори шифохонасини танламоқда.
