Бу ҳақда Давлат йўл ҳаракати хавфсизлиги хизмати Ахборот хизмати раҳбари Зойир Йўлдошев маълум қилди.
Унинг айтишича, воқеа жорий йилнинг 8 ноябрь куни соат 20:20 атрофида Тошкент шаҳрининг Шаҳрисабз кўчасида содир бўлган. Ҳайдовчи «Ҳаракат тўғрига» йўл белгиси талабига амал қилмасдан, чапга бурилгани учун ЙПХ ходими томонидан тўхтатилган.
Ҳайдовчи билан инспектор ўртасидаги мулоқот давомида тортишув келиб чиққан. Шунда сафарбарлик гуруҳи ЙПХ инспектори, кичик сержант Раимов ички ишлар органлари ходимлари риоя этиши шарт бўлган одоб-ахлоқ қоидаларини бузиб, фуқарони ҳақорат қилган.
Ҳолат юзасидан Тошкент шаҳар Йўл ҳаракати хавфсизлиги бошқармаси хизмат текширувини тайинлаган. Текширув даврида инспектор эгаллаб турган лавозимидан четлатилган.
Вазирлик баёнотида ички ишлар органлари ходимлари ҳар қандай вазиятда фуқаролар манфаати учун хизмат қилиши ва касбий одоб-ахлоқ қоидаларига риоя этиши шартлиги таъкидланган.
