Маълум қилинишича, жорий йил апрель ойида Марк Риз фуқаролик ишлари бўйича Учтепа туманлараро судига муаллифлик ҳуқуқи бузилиши оқибатида етказилган зарар учун компенсация ундириш ҳақида даъво аризаси киритган.

Суд ишни кўриб чиқиб, жавобгар — университет масъул ходими М.Чўтпўлатовдан даъвогар фойдасига базавий ҳисоблаш миқдорининг 50 баравари, яъни 20 миллион 600 минг сўм миқдорида товон ундириш ҳақида қарор чиқарди.

Аввалроқ Марк Риз Абдулла Қодирийнинг "Ўткан кунлар" асарини 15 йил давомида инглиз тилига “Bygone Days” номи билан таржима қилгани, аммо унинг электрон нусхаси рухсатсиз тарқатилгани юзасидан Адлия вазирлигига мурожаат қилган эди.

Мурожаат асосида ўтказилган ўрганишда ҳуқуқбузарлик ҳолати аниқланиб, университет масъул ходимига нисбатан Маъмурий жавобгарлик тўғрисидаги кодекснинг 177¹-моддаси асосида баённома расмийлаштирилган ва иш судга юборилган.

Суднинг аввалги қарори билан масъул ходимга 2 миллион 60 минг сўм жарима тайинланган, шунингдек, асарнинг электрон нусхасини unilibrary.uz тизимидан ўчириш мажбурияти юклатилган.

Қонунчиликка мувофиқ, муаллиф ҳуқуқи бузилган ҳолатларда муаллиф зарарни қоплаш ўрнига ҳуқуқбузардан базавий ҳисоблаш миқдорининг 20 бараваридан 1000 бараваригача товон талаб қилиш ҳуқуқига эга.