Андижон шаҳрида пиёдалар ўтиш жойида содир бўлган йўл-транспорт ҳодисаси оқибатида икки киши ҳалок бўлди. Бу ҳақда вилоят ЙҲХБ ахборот хизмати хабар қилди.
Ҳодиса 25 июнь куни соат 17:55 ларда шаҳарнинг "Янги Бўстон" МФЙ, Амир Темур шоҳкўчасида юз берган.
1997 йилда туғилган Р.З. ўзига тегишли Malibu 2 автомобилини бошқариб кетаётиб, тартибга солинмаган пиёдалар ўтиш жойидан йўлни кесиб ўтаётган уч нафар пиёдага йўл бермаган ва уларни уриб юборган. Воқеа акс этган видеода уларнинг камида бир нафари бола эканини кўриш мумкин.
ЙТҲ оқибатида жабрланганлар шифохонага олиб борилган. Шифокорлар кўрсатган тиббий муолажаларга қарамай, улардан икки нафари вафот этган.
Ҳолат юзасидан Андижон шаҳар ИИО ФМБ тергов бўлими томонидан дастлабки тергов ҳаракатлари бошланган.
