Бош прокуратура ҳузуридаги Иқтисодий жиноятларга қарши курашиш департаменти маълум қилишича, терговга қадар текширув давомида фуқаро Ё.Қ. ва бошқалар ўзаро тил бириктириб, 5 та масъулияти чекланган жамият номидан ноқонуний схемани амалга оширган.
Аниқланишича, улар бошқа корхоналар томонидан гўёки 2,2 триллион сўмлик маҳсулот етказиб берилгани ҳақида сохта электрон ҳисоб-фактуралар расмийлаштирган. Шунингдек, савдодан тушган маблағлар назорат-касса машиналари орқали кирим қилингани ва маҳсулотлар фуқароларга сотилгани ҳақида харид чеклари шакллантирилган.
Ушбу сохта маълумотлар асосида 94 минг 921 нафар фуқаро ва ижтимоий ҳимоя реестрига киритилган шахсларга «Soliq Mobile» иловаси орқали «кешбэк» тўловлари расмийлаштирилиб, жами 38,3 миллиард сўм бюджет маблағи ўзлаштириш ва растрата қилиш йўли билан талон-торож қилингани маълум бўлган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатлар, штамплар, муҳрлар, бланкаларни қалбакилаштириш ёки улардан фойдаланиш) билан жиноят иши қўзғатилган.
Ҳозирда иш бўйича тергов ҳаракатлари давом этмоқда.
