Бу ҳақда Давлат хавфсизлик хизмати маълум қилди.
Қайд этилишича, Давлат хавфсизлик хизмати ҳамда Бош прокуратура ҳузуридаги Департамент ходимлари ҳамкорлигида ўтказилган тезкор тадбирлар давомида бир нечта мансабдор шахслар қўлга олинган.
Биринчи ҳолатда, Давлат активларини бошқариш агентлигининг Андижон вилояти ҳудудий бошқармаси бош мутахассиси маҳаллий тадбиркорга суд масаласини унинг фойдасига ҳал қилиб беришни ваъда қилган. У кўчмас мулк бўйича тузилган шартномани бекор қилмаслик эвазига 15 минг АҚШ доллари талаб қилган.
Тезкор тадбир давомида мансабдор шахс пул маблағини учинчи шахс орқали олган вақтида ушланган.
Яна бир ҳолатда, «Ҳудудий электр тармоқлари» акциядорлик жамияти Андижон ҳудудий филиали муҳандиси тадбиркорнинг шоли қуритиш цехида электр энергиясидан ноқонуний фойдаланилгани бўйича ҳисобланган 650 миллион сўм зарар миқдорини камайтириб беришни ваъда қилган.
У 40 миллион сўмгача камайтириш эвазига 15 минг АҚШ доллари талаб қилиб, шундан 10 минг долларини олган вақтида қўлга тушган.
Шунингдек, вилоят туманларидан биридаги Кадастр бўлими бошлиғи фуқарога уй-жой қуриш ва деҳқон хўжалиги ташкил қилиш учун ер ажратиб бериш эвазига аввалдан 3 минг АҚШ доллари олгани аниқланган.
Тергов маълумотларига кўра, у фуқарога 8 сотих ер ажратилгани ҳақида сохта ҳужжат ҳам расмийлаштириб берган. Кейинчалик хатлов жараёнида мазкур ер майдони ноқонуний ажратилгани маълум бўлиб, фуқарога 82 миллион сўм жарима қўлланилган.
Кадастр ходими пулни учинчи шахс орқали қайтариб бераётган вақтида фош этилган.
Ҳозирда ушбу ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
