Рақамли технологиялар вазирлиги ташаббуси билан Андижон давлат техника университети ва Андижон давлат университети ҳамкорлигида «GAP» хотин-қизлар АТ клуби томонидан ташкил этилган учрашувда 200 нафардан ортиқ иштирокчи қатнашди. Улар орасида техник йўналишларда таҳсил олаётган ва ўз стартап лойиҳаларини амалга ошираётган талаба-қизлар ҳам бор.
Учрашувда иштирокчиларнинг лойиҳаларни амалга оширишда дуч келаётган қийинчиликлари, касбий ривожланиш ва технологик тадбиркорликка оид саволларига алоҳида эътибор қаратилди. Экспертлар уларга амалий тавсиялар бериб, стартап ғояларини ривожлантириш ва кейинги қадамларни белгилаш бўйича йўл-йўриқ кўрсатди.
Шунингдек, Рақамли технологиялар вазирлиги, IT Park, Рақамли таълимни ривожлантириш маркази, UZINFOCOM ҳамда «Ўзбеккосмос» агентлиги вакиллари иштирокида рақамли таълим, сунъий интеллект, киберхавфсизлик, космик технологиялар ва касбий ривожланиш имкониятлари тақдим этилди.
Бундан ташқари, Tashkent International University Andijan Campusда «AI–Talaba» форуми ҳам ташкил этилди. Унда «GAP» хотин-қизлар АТ клуби, IT Park, «Ўзбеккосмос» агентлиги ва киберхавфсизлик йўналиши мутахассислари ёшлар билан учрашиб, замонавий технологиялар соҳасидаги таълим ва касбий имкониятлар ҳақида маълумот берди.
Форум доирасида қизларнинг рақамли кўникмаларини ривожлантириш, замонавий касбларни эгаллаш, шахсий маълумотларни ҳимоя қилиш, рақамли гигиена ва интернет хавфсизлиги масалалари ҳам муҳокама қилинди.
Тадбирлар якунида фаол иштирокчиларга 20 мингдан ортиқ халқаро курсларда таълим олиш имконини берувчи сертификатлар топширилди.
Ташаббуслардан кўзланган мақсад — ҳудудлардаги ёшлар ва қизларнинг билим ҳамда ғояларини амалий лойиҳаларга айлантириш, уларнинг рақамли технологиялар соҳасида касбий ривожланиши ва технологик тадбиркорлик билан шуғулланишига кўмаклашишдан иборат.
