ИИВ ахборот хизматининг маълум қилишича, йўл-патруль хизмати инспектори томонидан тўхтатилган ҳайдовчи ўзини ҳуқуқни муҳофаза қилувчи орган ходими сифатида таништириб, хизмат гувоҳномасини кўрсатган.
Бироқ инспектор ҳужжатни синчиклаб текшириш чоғида унинг қалбаки эканини пайқаган. Хусусан, гувоҳноманинг ички қисмида «Ўзбекистон Республикаси Санитария-эпидемиологик осойишталик ва жамоат саломатлиги хизмати Андижон вилояти Жалақудуқ тумани бўлими» деган ёзув мавжуд бўлгани аниқланган.
Шундан сўнг ЙПХ инспектори аниқланган ҳолат юзасидан Ички ишлар вазирлиги Шахсий хавфсизлик бош бошқармасига мурожаат қилган. Тезкор тадбирлар давомида гумонланувчи ушланди.
Тошкент шаҳар Ички ишлар бош бошқармасининг таъкидлашича, бундай кўринишдаги хизмат гувоҳномалари расмий тартибда берилмайди ва улардан фойдаланиш қонунга хилоф ҳисобланади.
Ҳозирда мазкур ҳолат юзасидан Андижон вилояти Ички ишлар бошқармаси томонидан терговга қадар текширув ҳаракатлари олиб борилмоқда.
Ҳуқуқни муҳофаза қилувчи органлар мазкур шахснинг ҳаракатларидан жабр кўрган фуқароларни Ички ишлар вазирлигининг Шахсий хавфсизлик бош бошқармасига 1102 ёки (71) 231-31-74 телефон рақамлари орқали мурожаат қилишга чақирди. Мурожаат қилувчиларнинг шахси сир сақланиши кафолатланади.
