Сичқонларда ўтказилган тажрибаларда у юрак фаолиятининг айрим кўрсаткичларини 80 фоизгача яхшилади.
Лондон Қироллик коллежи олимларининг мазкур тадқиқоти “Science Advances” журналида чоп этилди, деб хабар берди lenta.ru.
Гап уролитин А — анор таркибидаги бирикмалардан ичак бактериялари ҳосил қиладиган модда ҳақида бормоқда. Илгари олимлар уни яллиғланишга қарши ва антиоксидант таъсирлар билан боғлашган, аммо унинг юрак етишмовчилигига таъсири ҳали ҳам кам ўрганилган.
Муаллифлар уролитин А нинг таъсирини юрак етишмовчилиги бўлган, қон отиб бериш фракцияси сақланган сичқонларда текшириб кўришди. Бу ҳолатда юрак нормал қисқариш қобилиятини сақлаб қолади, бироқ жуда қаттиқ бўлиб қолади ва зарбалар орасида ёмонроқ бўшашади.
Бу модда ҳайвонларда юракда чандиқли тўқима ҳосил бўлишини камайтирди ва унинг бўшашиш қобилиятини яхшилади. Айрим кўрсаткичлар бўйича юрак фаолияти бирикма қабул қилмаган сичқонларга нисбатан 80 фоизгача яхшиланган.
Қўшимча тажрибалар лабораторияда ўстирилган инсон юраги тўқимасида ўтказилди. Уролитин А унинг қисқариши ва бўшашишини тезлаштирди. Олимлар бу таъсирни босимни тартибга солиш ва юрак мушакларини бўшаштиришда иштирок этувчи ПКГИα оқсилининг фаоллашуви билан боғлашади.
Шу билан бирга, муаллифларнинг таъкидлашича, натижалар анор истеъмоли юрак етишмовчилигини бутунла даволай олади дегани эмас.
