Қарор БАА Вазирлар Маҳкамаси томонидан мамлакат Вице-президенти, Бош вазири, Дубай Амири шайх Муҳаммад бин Рашиш Ал Мактум раислигида қабул қилинди.
Янги қоидаларга кўра, 15 ёшгача бўлган болаларга ижтимоий тармоқларда шахсий аккаунтлар яратиш ва улардан фойдаланиш, шунингдек, контент эълон қилиш, шарҳ қолдириш, очиқ гуруҳларда иштирок этиш ва бошқа кенг онлайн мулоқот шакллари каби платформанинг асосий функцияларига кириш тақиқланади.
15 ёшдан 16 ёшгача бўлган ўсмирлар учун ижтимоий тармоқлардан фойдаланишга махсус ҳимоя чоралари қўлланилган ҳолда рухсат берилади. Буларга ёшга боғлиқ контент, номаълум фойдаланувчилар билан ўзаро алоқалар каби юқори хавфли функцияларни ўчириб қўйиш, платформадан фойдаланишда вақтга асосланган назорат ва ота-она назорати воситаларининг мавжудлиги киради.
Қарор шунингдек, платформалардан фойдаланувчилар учун рақамли идентификация, сунъий интеллект технологиялари ва биометрик воситалар каби мустаҳкам ёшни текшириш механизмларини жорий этишни талаб қилади. Фойдаланувчининг ёшини шунчаки кўрсатишнинг ўзи етарли текшириш деб ҳисобланмайди.
Бундан ташқари, ижтимоий тармоқларга болаларнинг онлайн хатти-ҳаракатларини кузатиш асосида уларнинг маълумотларидан мақсадли реклама учун фойдаланиш тақиқланади. Платформалар, шунингдек, янги талабларни бузган ҳолда яратилган 15 ёшгача бўлган болаларнинг аккаунтларини аниқлаши ва блоклаши шарт.
Ижтимоий тармоқларга янги қоидаларга риоя қилиш учун 12 ойгача бўлган ўтиш даври берилди, деб хабар берди report.az.
