— Бир неча йиллардан бери парранда боқиш билан шуғулланиб келмоқдамиз, — дейди мазкур маҳалла Раҳшон кўчаси 18-уйда яшовчи Навбаҳор Очилова. — Ҳозир уйимизда беш минг бошдан кўпроқ бедана парваришланмоқда. Улар яқинда тухумга кирди ва бир йил маҳсулот беради, кейин гўштга топширилади. Сир эмас, ҳозир кунига 4-4,5 минг дона тухум олмоқдамиз. Шу кунларда унинг донасини 350-400 сўмдан сотаяпмиз, уйимиздан олиб кетади. Ишлаган одам кам бўлмас экан, ҳаракат қилаяпмиз яхши яшаяпмиз. Шуни орқасидан оиламиз бут, дастурхонимиз тўкин, тўйлар қилдик.
Н. Очилованинг айтишича, ҳар йили инкубатордан чиққан бедана жўжаларини (донасини) 1000-1200 сўмдан сотиб олади. Улар бир ярим ой деганда тухумга киради. Кунига икки маҳал – эрталаб ва кечқурун озиқлантирилади, доимий равишда сув берилади, таги тозалаб турилади. Хуллас, парранда боқишнинг меҳнати осон эмас, шунга яраша даромади бор.
Давлатимиз раҳбарининг 2026 йил 23 июлдаги “Паррандачилик соҳасини кўллаб-қувватлаш бўйича қўшимча чора-тадбирлар тўғрисида” қарори бу борада тадбиркорликни ривожлантириш учун кенг имкониятлар яратмоқда.
Мутахассисларни таъкидлашича, бедана тухуми ва гўштини истеъмол қилиб туриш юрак, кам қонлик, гипертония, гастрит, ошқозон яраси, қандли диабет, астма, туберкулёз ва айрим кўз касалликларига жуда фойдали. Унинг тухумидаги A, PP, B1 ва B2 витаминлари товуқникидан анча юқори ҳисобланади.
Х. Салимов,
“Yuz.uz” мухбири
