Алам ва чорасизлик каби туйғулар миллионлаб юракларни қуршаб олди.
Ҳис-ҳаяжонлар жўшиб, кимдир айбдорларни қидирди, бошқалар юпанч остонасидан жой эгаллади.
Қалблардан отилган ҳайқириқлар ҳали-ҳамон уммонларни тоширмоқда.
Нега шундай бўлди? Нега биз бу чемпионатда муваффақият билан қайтмадик? Биз ғалабага лойиқ эмасмидик?
Мунгли ва аллақандай изтиробли нигоҳлар сўнгги кунларда барчамизни қамраб олди.
Айримлар Жаҳон чемпионатига чиқишимизнинг ўзи буюк тарих, футболчиларимиз борини бериб ўйнади, деса, бошқалар мураббий маҳоратининг йўқлиги ҳамда баъзи футболчиларнинг савиясини рўкач қилиб хейтлаштиришди.
Ижтимоий тармоқларда терма жамоа мураббийи ва футболчиларга қарши турли салбий фикрлар ва ҳатто ҳақоратларни кузатдик.
Шуларни кўрганда, ўйланиб қоласан киши: “Кечагина биз терма жамоамизни Жаҳон чемпионатига чиққанида кўкка кўтариб, ғурур ва ифтихорга буркаган эдик. Нега бугун мағлубиятга учраганда қирғоқнинг нариги томонига ўтиб, уларга аёвсиз хейтлар ёғдираяпмиз...”.
“Биз киммиз ўзи? Қандай халқмиз? Қандай миллатмиз?”.
Кеча Япония терма жамоаси Бразилияга қарши тенгма-тенг курашиб, 1:1 ҳисобида якун топаётган ўйиннинг охирги сонияларида гол ўтказиб юбориб, чемпионатдаги юришини тўхтатди.
Мураббийдан тортиб, футболчилар ва бутун япон халқи йиғлади... Ўта аламли мағлубиятдан сўнг мураббий ва футболчилар стадиондаги ишқибозлар ва бутун халқидан узр сўради.
Қойил қолиш керак, японлар кўз ёшларини тия олмаса-да, терма жамоасини ёмонлаганини кузатмаяпмиз. Кузатмаймиз ҳам... Тасанно! Мана миллат ва халқ якдиллиги, ҳамжиҳатлиги...
Лекин мағлубиятдан кейин ўз жамоаларини ҳақорат қилиб, ҳурматсизлик уммонига ғарқ қилганлар ҳам бўлди.
Мана Уругвай терма жамоаси футболчилари аэропортда чипта қидириб сарсон бўлишди. Нимага? Чунки мамлакат ҳукумати ўз терма жамоаси мағлубиятга учраб, гуруҳ босқичидан чиқа олмаганидан кейин, уларга аталган чартер самолётни АҚШга юборишдан бош тортди.
Буни қандай тушуниш керак?
Жанубий Корея ҳам гуруҳдан чиқолмагач, мамлакат раҳбарияти ўз футбол федерацияси ва терма жамоасида текширувлар бошлаб юборди.
Буям ёндашувми?
Халқимизда “Ғалабанинг минг битта отаси бор, мағлубият эса ҳамиша етим” деган нақл бор.
Тан олиш керак, биз биринчи бор иштирок этган Жаҳон чемпионати ҳаммамиз учун синовли бўлди.
Бундай пайтда қандай йўл тутишимиз керак, деган савол барчамизни қийнаши турган гап.
Франциялик йирик олим Гюстав Лебон “бирор бир миллатнинг миллат сифатида шаклланиши учун мингйиллар керак”, деган экан.
Биз – уч минг йиллик тарихи соҳиби бўлган миллатмиз, қудратли халқмиз!
Миллатимиз, халқимизга эса асрлар давомида бағрикенглик, ватансеварлик, инсонпарварлик каби олижаноб хислатлар хос, албатта.
Алоҳида таъкид қилиш керак, мана шундай онларда Давлатимиз Етакчисининг жаҳон чемпионатида терма жамоамиз иштирокига муносабати жуда кўпчиликнинг, хусусан, менинг ҳам юрагимга мўъжизали малҳам бўлди. Бу холис фикр.
Буни айтмаслик ҳам нотўғри.
Юртда, миллатда, халқнинг ана шундай мушкул онларида жуда топиб айтилган сўзлар, менимча, ҳаммамизнинг ҳовуримизни босиб, ҳолатга кенгроқ ва чуқурроқ қарашга ундади:
“Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим” деди Президентимиз.
Айнан, халқимизга хос иш эмас.
Бугун АҚШдан қайтган терма жамоамиз аъзолари аэропортда тантанали равишда кутиб олиниши миллатимизнинг, халқимизнинг, ҳар биримизнинг ким эканлигимизни яна бир бор намоён этди, десак буям айни ҳақиқат.
Тан олайлик, матонатли ўғлонларимиз майдонда борини бериб курашди. Уларнинг оёқлари ҳам, қалблари ҳам моматалоқ бўлганини ўзимиз кўрдик.
Ҳаётдаги ҳақиқий ғолиб ҳеч қачон йиқилмайдиган эмас, балки ҳар сафар йиқилганида яна ўрнидан туриб, ўз устида ишлай оладиган, мақсади сари курашишда давом этадиган инсондир.
Муваффақият ортга чекинмасликда эмас, балки қийинчиликлардан сабоқ чиқариб, янада кучлироқ бўлиб қайтишдадир.
Дарҳақиқат, биз бу синовлардан бошимизни ғурур билан кўтарган ҳолда ўтамиз. Камчиликларимизни тўғрилаймиз.
Биз кучли бўлиб қайтамиз.
Биз, албатта, улкан ғалабаларга эришамиз – Ватан учун, миллат учун, халқ учун!
Салим Дониёров,
Ўзбекистон Республикасида хизмат кўрсатган журналист
