Унда Жаҳон океанининг ҳолати иқлим ўзгариши, ифлосланиш, балиқларни меъёрдан ортиқ овлаш ва биологик хилма-хилликнинг камайиши туфайли ёмонлашаётгани таъкидланган. Баҳолаш 86 мамлакатдан жалб этилган 600 нафар олим томонидан тайёрланган. Ҳисоботда денгиз сатҳининг кўтарилаётгани, сувнинг кислоталаниш даражаси ошиб бораётгани, маржон рифларининг нобуд бўлаётгани ва балиқ захираларининг камаяётгани қайд этилган. Бу 2015 йилдан бери ўтказилган учинчи шундай баҳолаш бўлиб, аввалгиси 2021 йилда чоп этилган эди.
1352 саҳифадан иборат ҳисоботга кўра, инсонлар истеъмол қиладиган ҳайвон оқсилининг тахминан 20 фоизини таъминлайдиган балиқ ресурслари қисқаришда давом этмоқда. 2021 йилда жаҳон балиқ захираларининг қарийб 38 фоизи уларнинг қайта тикланиш суръатидан тезроқ овланган. 2019 йилда эса бу кўрсаткич 35 фоизни ташкил этган.
Шу билан бирга, ҳужжатда океанлар деградациясининг асосий омилларидан бири ифлосланиш экани таъкидланган. Пластик чиқиндилар, қишлоқ хўжалиги оқавалари, маиший ва саноат оқова сувлари ҳамда турли кимёвий моддалар денгиз организмларида тўпланиб, озиқ-овқат занжири орқали инсон истеъмол қиладиган турларга ҳам ўтади.
Муаллифлар ҳисоб-китобларига кўра, жаҳон иқтисодий фаолиятининг 45 фоизгача қисми қирғоқбўйи ҳудудларида жамланган. Тахминан 3 миллиард киши соҳилдан 100 километр масофа доирасида яшайди.
Океан сувларининг тез суръатларда исиши глобал денгиз сатҳининг 30 – 50 фоизига кўтарилишига сабаб бўлмоқда. 2013 – 2023 йилларда океан сатҳи йилига ўртача 4,3 миллиметрга кўтарилган бўлса, 1993 – 2002 йилларда бу кўрсаткич 2,1 миллиметрни ташкил этган. Бунинг асосий сабаби — сувнинг исиши оқибатида унинг ҳажми кенгайиши билан боғлиқ.
Аввалроқ денгиз юзаси ҳарорати 2019 йилдан буён 1980-йиллар охирига нисбатан 4,5 баробар тезроқ ўсиб бораётгани ҳақида хабар берилган эди. Шунингдек, қарийб йигирма йиллик музокаралардан сўнг БМТга аъзо 193 давлат Жаҳон океанини муҳофаза қилиш бўйича тарихий келишувни қабул қилган эди, деб хабар берди korrespondent.net.
