Лойиҳанинг биринчи босқичи Шаҳрисабз–Миробод–Шота Руставели айланма чорраҳасидан Амир Темур шоҳ кўчаси билан кесишмасигача бўлган 1,2 километрлик йўл қисмини қамраб олган. Бу ҳудудда қурилиш-таъмирлаш ишлари 2026 йил 24 июлдан бошланган.

Айни пайтда йўл асосини БРТ йўлаги талабларига мослаштириш, мавжуд грунт ва намлик билан боғлиқ ҳолатларни бартараф этиш ишлари олиб борилмоқда.

Йўлнинг асоси ҳам қайта тайёрланмоқда

БРТ йўлагидан мунтазам равишда катта сиғимли ва оғир автобуслар ҳаракатланиши инобатга олиниб, фақат йўлнинг устки қатламини янгилаш билан чекланилмаяпти. Йўлнинг асоси ҳам тўлиқ қайта тайёрланмоқда.

Шу мақсадда йўл қисми 2 метрдан ортиқ чуқурликкача қазилиб, мавжуд асос қайта шакллантирилмоқда. Бу орқали йўл остида тўпланадиган намликни бартараф этиш, грунтнинг силжиши ва чўкиши хавфини камайтириш ҳамда оғир автобусларнинг доимий қатновига мос мустаҳкам асос яратиш кўзда тутилган.

Шунингдек, келгусида йўл қопламасида деформация ва чўкишлар юзага келишининг олдини олишга эътибор қаратилмоқда.

Қурилиш жараёнида йўл конструкцияси қатламлари орасига геотекстил материали ҳам ётқизилмоқда. У грунт, қум-шагʼал ва бошқа конструктив қатламларни бир-биридан ажратиб, уларнинг аралашиб кетишини чеклайди. Бу йўл асосининг барқарорлигини ошириш ва юклама таъсирида деформация юзага келиш хавфини камайтиришга хизмат қилади.

Геотекстил, шунингдек, фильтрация вазифасини бажаради: сувнинг қатлам орқали ўтишига имкон берган ҳолда грунтнинг майда заррачаларини ушлаб қолади. Бу, айниқса, нам грунт мавжуд бўлган шароитда йўл конструкциясининг барқарорлиги учун муҳим.

6 та автобус бекати ташкил этилади

Лойиҳа доирасида мазкур 1,2 километрлик участкада 6 та автобус бекати ташкил этиш режалаштирилган.

Автобуслар учун ажратиладиган махсус йўлак бошқа транспорт воситалари ҳаракатланадиган қатнов қисмидан бордюрлар орқали жисмонан ажратилади. Бу автобусларнинг умумий транспорт оқимига қўшилиб кетмасдан, алоҳида йўлак бўйлаб ҳаракатланишини таъминлашга хизмат қилади.

БРТ йўлагини қуришда Тошкент шаҳрида фойдаланилаётган автобусларнинг техник кўрсаткичлари, уларнинг оғирлиги, ушбу йўналишдаги кунлик қатновлар сони ва йўлга тушадиган доимий юклама ҳисобга олинмоқда.

Ишлар 31 августга қадар якунланиши режалаштирилган

Айни пайтда йўл асосини тайёрлаш ва мустаҳкамлаш, шунингдек, БРТ инфратузилмасини шакллантириш ишлари давом этмоқда.

Қурилиш жараёнининг кўлами ва технологик талаблардан келиб чиқиб, 1,2 километрлик участкадаги ишларни 2026 йил 31 августга қадар тўлиқ якунлаш ва йўл қисмини фойдаланишга топшириш режалаштирилган.

Мазкур участка Шаҳрисабз кўчасида БРТ инфратузилмасини ташкил этиш лойиҳасининг биринчи босқичи ҳисобланади. Кейинги босқичларда БРТ йўлагини Шаҳрисабз кўчаси бўйлаб давом эттириш режалаштирилган.

Лойиҳанинг асосий мақсади жамоат транспорти учун алоҳида ва барқарор ҳаракат йўлагини яратиш ҳамда автобуслар қатновининг узлуксизлигини таъминлашдан иборат.