Бунга сўнгги кунларда йирик агрегаторларда кузатилган техник носозликлар ортидан тиғиз вақтларда бошқа платформаларда ҳам такси хизматлари нархи бир неча баробаргача ошгани сабаб бўлди.
Қўмита маълум қилишича, ўрганишлар доирасида хизматлар нархининг оширилиши асослилиги ва рақобат тўғрисидаги қонунчилик талабларига риоя этилишига алоҳида эътибор қаратилмоқда.
Шу муносабат билан такси агрегаторларидан нархларни шакллантириш алгоритмларини қайта кўриб чиқиш ва уларнинг кескин ҳамда сунъий равишда ошишининг олдини олиш сўралди.
Шунингдек, агрегаторларга қуйидаги чораларни кўриш тавсия этилди:
ҳайдовчилар маблағларини ҳисобларига ўтказишда юзага келган техник носозликларни бартараф этиш;
асоссиз блокланган ҳайдовчиларни блокдан чиқариш;
бажарилган буюртмалар учун кўзда тутилган бонусларни қайта ҳисоб-китоб қилиб, тўлаб бериш;
рақобат тўғрисидаги қонунчилик талабларига риоя этиш ва рақобатчиларга нисбатан инсофсиз рақобатга йўл қўймаслик;
ҳайдовчилар ва йўловчилар учун 24 соат ишлайдиган техник ёрдам марказларининг узлуксиз фаолиятини таъминлаш.
Қўмита таъкидлашича, рақобат муҳитидаги ҳар қандай ҳаракат истеъмолчилар манфаатларига зид бўлмаслиги, хизматлар нархи ва сифати эса адолатли ҳамда шаффоф тамойилларга асосланиши лозим.
Агар ўрганишлар давомида рақобат тўғрисидаги қонунчилик талаблари бузилгани ёки истеъмолчилар ҳуқуқлари поймол этилгани аниқланса, белгиланган тартибда текширув ўтказилиб, тегишли чоралар кўрилади.
