Бу Ўзбекистон Республикаси Президентининг 2026 йил 12 октябрдаги «Транспорт-логистика тизимини ривожлантиришга доир қўшимча чора-тадбирлар тўғрисида»ги қарорида белгиланган.
Ҳужжатга кўра, 2026–2030 йилларда транспорт-логистика тизимини ривожлантириш бўйича бир қатор мақсадли кўрсаткичларга эришиш назарда тутилган. Жумладан, транспорт ва логистика хизматлари экспортини 3,5 млрд АҚШ долларига, республика ҳудуди орқали транзит юк ташиш ҳажмини эса 18,5 млн тоннага етказиш белгиланган.
Шунингдек, давлат чегараси орқали ўтказиш пунктларининг юк ташиш қобилияти ва транспорт-логистика марказларида контейнерларга ишлов бериш қуввати икки баробарга оширилади.
Қарорга мувофиқ, Андижон вилоятининг Хонобод шаҳри, Бухоро вилоятининг Олот тумани, Сурхондарё вилоятининг Термиз тумани ҳамда Тошкент вилоятининг Янгийўл ва Оҳангарон туманлари транспорт-логистика соҳасига ихтисослаштирилади.
Транспорт-логистика марказларида терминалларни бошқариш (TOS) ва омборларни бошқариш (WMS) тизимлари жорий этилади. Улар 2030 йил охиригача Транспорт вазирлигининг «E-logistika» платформасига уланади.
Қарорда транспорт-логистика марказлари учун солиқ ва божхона имтиёзлари ҳам назарда тутилган.
Жумладан, белгиланган талабларга жавоб берадиган марказлар 2040 йилгача ер солиғи ва мол-мулк солиғидан тўлиқ озод қилинади. Бунинг учун марказ ЭСКАТОнинг қуруқлик портлари тўғрисидаги битимига киритилган бўлиши, тегишли тизимларни жорий этган ва «E-logistika» платформасида «BB» ва ундан юқори рейтингга эга бўлиши шарт.
Транспорт-логистика марказлари реестрига киритилган марказлар учун 2029 йил 1 августгача республикада ишлаб чиқарилмайдиган омборхона ускуналари, юк ортиш-тушириш техникаси, агрегатлар ва эҳтиёт қисмларни олиб киришда божхона божи ва мажбурий сертификатлаш бўйича имтиёзлар берилади.
Бундан ташқари, 2026 йил 1 ноябрдан халқаро курьерлик жўнатмаларини божхона расмийлаштирувидан ўтказганлик учун амалдаги божхона йиғими ставкаси 20 фоизга пасайтирилади.
Қарорга кўра, 2027 йил 31 декабргача М₂, М₃ ва N тоифадаги транспорт воситаларини ишлаб чиқарувчи корхоналар республикада ишлаб чиқарилмайдиган компонентларни божхона божи тўламасдан импорт қилиши мумкин.
