Тошкент вилояти мактабгача ва мактаб таълими бошқармасининг маълум қилишича, воқеа 2026 йил 28 август куни Оҳангарон шаҳар Мактабгача ва мактаб таълими бўлими тасарруфидаги 6-сонли мактабгача таълим ташкилотида содир бўлган.
2023 йилда туғилган тарбияланувчи ошхонада ҳашаротларга қарши ишлатиладиган БСМ воситасини ичиб қўйган. Бола зудлик билан Оҳангарон шаҳар тиббиёт бирлашмасига олиб борилган. Бироқ шифокорлар унинг ҳаётини сақлаб қолишга муваффақ бўлмаган.
Мавжуд маълумотларга кўра, боланинг бувиси мазкур ташкилот ошхонасида аутсорсинг ташкилоти ходими, ошпаз сифатида ишлаган. Ҳодиса бола бувисининг ёнига, ошхонага кирган вақтда содир бўлгани айтилмоқда.
Айни пайтда воқеанинг барча тафсилотлари ваколатли органлар томонидан ўрганилмоқда. Жумладан, боланинг ошхонага қандай киргани, хавфли восита нима сабабдан унинг қўли етадиган жойда тургани ва мазкур воситани сақлаш учун ким масъул бўлгани текширилмоқда.
Масъул ташкилотлар таъкидлашича, ҳодисанинг барча жиҳатларига ҳуқуқий баҳо берилади. Тергов-суриштирув ишлари якунлари бўйича айби аниқланган шахсларга нисбатан қонунчиликда белгиланган тартибда чора кўрилади.
