Унда мутасаддилар томонидан фестивалга тайёргарлик ишлари ва ўтказиш билан боғлиқ маълумотлар берилди.

Президентимиз ўтган йили апрель ойида Андижон вилоятига ташрифи чоғида Бобур шаҳри миллий маданият ва санъатимиз, ўзбекона меҳмондўстлик, бағрикенглик ва ҳамкорликни акс эттирадиган ўзига хос кўзгу бўлиши зарурлигини таъкидлаб, бу ерда рассомлар фестивалини ўтказишни таклиф қилган эди. Вазирлар Маҳкамасининг 2025 йил 30 декабрдаги “Андижон вилояти Бобур шаҳрида рассомлар фестивалини ташкил этиш ва ўтказиш чора-тадбирлари тўғрисида”ги қарорига мувофиқ, фестивални ҳар икки йилда бир марта ташкиллаштириш белгиланди.

– Учинчи Ренессансни ўз олдига катта мақсад қилиб қўйган янги Ўзбекистонда миллий тасвирий ва амалий санъатни ривожлантириш масаласига алоҳида эътибор қаратилмоқда, – дейди Бадиий академия раиси Акмал Нуриддинов. – Давлат раҳбари ва ҳукуматнинг тасвирий ва амалий санъат соҳасига бундай эътибори натижасида халқаро жамоатчиликка юртимизнинг миллий бадиий бойликларини ҳамда мусаввирлар ижод намуналари ва ютуқларини кўрсатишга кенг имконият яратилди. Мамлакатимизда биринчи марта бўлиб ўтадиган рассомлар фестивали ҳам нуфузли санъат анжуманлари қаторидан жой олади.

Мутасаддиларнинг таъкидлашича, ёш истеъдодларни миллий ўзликни англаш ғояларини тараннум этувчи ёрқин асарлар яратишга ундовчи муҳит яратиш, соҳа ривожига муносиб ҳисса қўшаётган тажрибали ижодкорлар, истеъдодли рассомларни аниқлаш, уларни маънавий ҳамда моддий рағбатлантириб бориш, жаҳон санъат майдонида муносиб ўрин эгаллашга интилишларини қўллаб-қувватлаш фестивалнинг асосий мақсади саналади.

Бундан ташқари, ўзбек тасвирий санъатининг турли йўналишларини янада ривожлантириш, халқимизнинг ушбу нафис санъатга бўлган эстетик эҳтиёжини қондириш, ижодкорларга зарур шарт-шароит яратиб, уларнинг бадиий салоҳиятини ошириш, тасвирий санъатимизнинг ўзига хос жиҳатлари, анъана ва ютуқларини халқаро ҳамжамиятга намойиш қилиш масалаларига ҳам алоҳида эътибор қаратилади.

– Қолаверса, Бобур шаҳрини ёшлар учун илҳом, ижодий парвоз масканига, юртимизнинг яна бир туризм ва маданият марказига айлантириш, сайёҳлик салоҳиятини юксалтиришда ушбу фестивалнинг аҳамияти юқори бўлади, – дейди Ўзбекистон Бадиий ижодкорлар уюшмаси раиси Иброҳим Валихўжаев. – Фестивалда Қорақалпоғистон ва вилоятлардан тасвирий санъатнинг рангтасвир, бадиий фото, ҳайкалтарошлик ва графика йўналишларида тажрибага эга 200 нафарга яқин ижодкор иштирок этади.

Шунингдек, фестиваль доирасида тасвирий санъат йўналиши бўйича ижодий асарлар кўргазмаси, таниқли ва иқтидорли ижодкорлар иштирокида маҳорат дарслари, ТУРКСОЙ билан ҳамкорликда халқаро илмий-амалий конференция, амалий санъат ва ҳунармандлик кўргазмалари, миллий ва тарихий либослар, бадиий дастурлар намойиши ташкил этилади.

Фестиваль ғолиблари Ўзбекистон Президенти совғаси сифатида енгил автомобиль, диплом, фестиваль рамзий ҳайкалчаси ва пул мукофотлари билан тақдирланади.

Нодир МАҲМУДОВ,

“Янги Ўзбекистон” мухбири