Бу ҳақда Яккасарой тумани ҳокимлиги ахборот хизмати маълум қилди.

Қайд этилишича, Яккасарой тумани Ички ишлар органлари фаолиятини мувофиқлаштириш бошқармасида Тошкент шаҳар Ички ишлар бош бошқармаси бошлиғи Равшан Султонхўжаев иштирокида саф йиғини бўлиб ўтди.

Йиғилишда туманда жамоат хавфсизлигини таъминлаш, ҳуқуқбузарликларнинг олдини олиш ҳамда фуқаролар осойишталигини мустаҳкамлаш борасида амалга оширилаётган ишлар муҳокама қилинди.

Тадбир якунида жасорат ва инсонпарварлик намунасини кўрсатган фидойи инсонлар муносиб тақдирланди.


Хусусан, Бўрижар каналида чўмилиш вақтида чўкаётган 13 ёшли Муҳаммаднинг ҳаётини сақлаб қолган Яккасарой тумани ИИО ФМБ пост-патруль хизмати инспектори Расул Жўраевнинг мардлиги ва тезкорлиги алоҳида эътироф этилди. Шунингдек, қутқарув жараёнида бевосита ёрдам кўрсатган фуқаро Зуҳриддин Эшқувватовнинг ҳам жасорати юксак баҳоланди.

Инсон ҳаётини сақлаб қолиш йўлидаги фидокорона ҳаракатлари ва қаҳрамонлиги учун Расул Жўраев ҳамда Зуҳриддин Эшқувватовга Тошкент шаҳар Ички ишлар бош бошқармаси бошлиғи Равшан Султонхўжаев ва Яккасарой тумани ҳокими Нилуфар Аллабергенова томонидан ташаккурнома, пул мукофоти ҳамда эсдалик совғалари тантанали равишда топширилди.

Тадбирда инсон ҳаёти энг олий қадрият экани, бундай жасорат ва фидойилик жамият учун ибрат бўлиши алоҳида таъкидланди.