Ўзбекистон Президенти Администрацияси раҳбари Саида Мирзиёева Бухоро вилоятига ташрифи давомида ҳудуднинг сайёҳлик инфратузилмасини тубдан яхшилаш ва туризм салоҳиятини ошириш бўйича амалга оширилаётган ишлар билан танишди. Ташриф доирасида мазкур лойиҳа ҳам тақдим этилди.
Йирик инвестициялар ҳисобидан амалга оширилиши режалаштирилаётган мажмуада Бухоронинг машҳур миллий таомлари — Ғиждувон шашлиги, Олот сомсаси, «Оши софи» палови, яхна, ҳалиса, гумма ва баракни бир жойда жамлаш кўзда тутилган.
Лойиҳа доирасида 50–60 нафар тадбиркор учун фаолият юритиш имконияти яратилади. Бунинг натижасида 200 та янги иш ўрни ташкил этилиши кутилмоқда.
Замонавий инфратузилмага эга гастрономик марказ кунига 3–5 минг нафаргача ташриф буюрувчига хизмат кўрсатиши мумкин.
Лойиҳа Бухоронинг сайёҳлик салоҳиятини ошириш ҳамда аҳоли ва сайёҳлар учун янги гастрономик ва ҳордиқ маскани яратишга қаратилган.
