Бухоро вилояти Экология бошқармаси матбуот хизмати хабар беришича, Экология полицияси ходимлари томонидан ўтказилган навбатдаги рейд тадбирлари давомида Пешку туманида яшовчи беш нафар фуқаронинг ноқонуний ов билан шуғуллангани аниқланган.
Маълум бўлишича, улар муҳофаза этиладиган ҳудудда тақиқланган тунги ёритиш мосламасидан фойдаланиб, ов қуроли ёрдамида жами 13 та қуённи овлаган.
Ҳолатни аниқлаш жараёнида ходимлар ҳаракатланиб келаётган УАЗ русумли автомобилни текшириш учун тўхтатган. Бироқ автомобилда бўлган фуқаролар ходимларнинг қонуний талабларига бўйсунмасдан, уларга қаршилик кўрсатган. Натижада экология ходимларидан бири тан жароҳати олган.
Жабрланган ходимга зудлик билан биринчи тиббий ёрдам кўрсатилиб, шифохонага ётқизилган. Воқеа жойига туман ички ишлар бўлими ходимлари ҳам жалб этилган.
Ҳозирда мазкур ҳолат юзасидан прокуратура органлари томонидан терговга қадар текширув ҳаракатлари олиб борилмоқда. Ҳолатга ҳуқуқий баҳо берилиши ва текширув натижалари бўйича қўшимча маълумот тақдим этилиши билдирилган.
