Олий Мажлис Сенатининг ялпи мажлисида коррупцияга қарши курашиш самарадорлигини ошириш ва коррупцияга оид жиноятлар учун жавобгарлик муқаррарлигини таъминлашга қаратилган қонун маъқулланди.
Ҳужжат билан Жиноят кодексига қатор муҳим ўзгартишлар киритилмоқда. Хусусан, кодексга «коррупцияга оид жиноятлар» атамаси ва уларнинг аниқ рўйхати киритилиб, ҳуқуқни қўллаш амалиётидаги ноаниқликларга барҳам берилади.
Шунингдек, пора олиш, пора бериш ва пора олиш-беришда воситачилик қилиш учун ҳукм қилинган шахсларга нисбатан жазодан муддатидан илгари шартли озод қилиш тартибини қўллаш тақиқланмоқда.
Қонунга кўра, хизмат мавқеидан фойдаланиб содир этилган фирибгарлик Жиноят кодексининг 168-моддасида ўта оғир жиноятлар тоифасига ўтказилмоқда. Бу турдаги жиноят учун ҳам 10 йилгача озодликдан маҳрум қилиш жазоси белгиланмоқда.
Яна бир муҳим янгилик ўзлаштириш ва растрата қилиш йўли билан талон-торож қилиш жиноятларига тааллуқли. Энди мансаб мақоми ёки хизмат ваколатидан фойдаланиб содир этилган бундай жиноятлар оғирроқ тоифага киритилиб, улар учун ҳам 10 йилгача озодликдан маҳрум қилиш жазоси назарда тутилмоқда.
Бундан ташқари, хусусий ва нодавлат секторда коррупциянинг олдини олиш мақсадида нодавлат ташкилотлари ходимларини пора эвазига оғдириб олиш билан боғлиқ жиноятлар учун жавобгарлик кучайтирилмоқда. Айрим жиноятларни «ғаразгўйлик ниятида» содир этиш эса жазони оғирлаштирувчи ҳолат сифатида белгиланмоқда.
Сенаторлар таъкидлаганидек, мазкур қонун коррупцияга қарши муросасиз муҳитни шакллантириш, давлат маблағлари талон-торож қилинишига қарши курашиш ва жиноят учун жазо муқаррарлигини таъминлашга хизмат қилади.
