Унга кўра, бемор имтиёзли йўлланма асосида тиббий ёрдам олиш учун ўзи бириктирилган бирламчи тиббий-санитария ёрдами муассасасига мурожаат қилади. Оилавий шифокор беморни кўрикдан ўтказиб, унинг амбулатор ёки стационар даволанишга эҳтиёжини белгилайди.
Агар стационар даволаниш зарур деб топилса, бемор DMED тизими орқали электрон йўлланма асосида туман ёки шаҳар кўп тармоқли марказий поликлиникасидаги тор соҳа мутахассисига йўналтирилади. Тор соҳа мутахассиси зарур ҳолларда қўшимча лаборатор ва инструментал текширувлар тайинлайди.
Натижаларга кўра, бемор шифохонада даволаниши зарур деб топилса, тегишли хулоса ва текширув натижалари DMED ахборот тизимига киритилади. Бемор имтиёзли тоифага кириши ахборот тизимлари интеграцияси орқали аниқланади ва унинг ҳужжатлари ҳудуд даражасидаги тиббий танлов комиссиясига юборилади.
Комиссия бемор учун қандай муолажа зарурлиги ва уни қайси даражадаги тиббиёт муассасасида даволаш мақсадга мувофиқлигини белгилайди. Яъни бемор туман-шаҳар, вилоят ёки республика даражасидаги муассасада даволаниши бўйича хулоса чиқарилади.
Агар беморни республика даражасида даволаш зарур бўлса, унинг ўзи эмас, ҳужжатлари DMED орқали республика комиссиясига юборилади. Республика комиссияси даволанишни маъқуллаши ёки беморни ҳудуд даражасида даволаш мумкинлиги ҳақида хулоса бериши мумкин.
Республика даражасида даволаниш тасдиқлангач, беморга тиббиёт ташкилотини танлаш ҳуқуқи берилади. Танлов беморнинг ўзи ёки унинг хоҳишига кўра оилавий шифокор орқали DMED тизимида амалга оширилади.
Тизимда беморнинг ташхиси ва зарур тиббий амалиёт бўйича хизмат кўрсатишга рухсат берилган давлат ва нодавлат тиббиёт ташкилотлари рўйхати шаклланади.
Бемор ушбу рўйхатдан ўзига маъқул тиббиёт ташкилотини 30 кун ичида танлаб, йўлланмани тасдиқлаши керак.
Шундан сўнг бемор тегишли йўналиш бўйича электрон навбатга қўйилади. Навбат етиб келгач, йўлланма автоматик тасдиқланади ва тиббиёт ташкилоти беморни хабардор қилади.
Бемор йўлланма тасдиқланган кундан бошлаб 10 кун ичида тиббиёт ташкилотига келиши лозим. Акс ҳолда йўлланма ўз кучини йўқотади ва бемор қайтадан навбатга туриши керак бўлади.
Шу билан йўлланма расмийлаштириш ва электрон навбатга қўйиш жараёни якунланиб, беморни даволаш босқичи бошланади.
Даволаш ва ташхислаш белгиланган стандартлар, клиник протоколлар ҳамда тиббий кўрсатмалар асосида амалга оширилади. Юқори технологик тиббий ёрдам кўрсатишда ҳам белгиланган тартибга риоя қилинади.
Муолажа учун зарур бўлган дори воситалари, қимматбаҳо тиббий буюмлар ва бошқа тегишли харажатлар давлат бюджети маблағлари ҳисобидан қопланиши кўзда тутилган. Шу сабабли мазкур даволаниш доирасида бемордан қўшимча тўлов олинмайди.
