Кенгроқ маънода, глобал технологик таъминот занжирининг маркази Шарқий Осиёда жойлашган. Бу ерда яримўтказгичли чиплар ва дисплейлардан тортиб босма платалар, смартфонлар ва компьютерларгача ишлаб чиқарилади.
Инфографикада мамлакатлар рақамли технологиялар соҳасидаги жаҳон ишлаб чиқариш қувватларининг улушига кўра, шунингдек, асосий ишлаб чиқариш марказларидаги энг йирик электрон саноат компаниялари кўрсатилган. Визуализация маълумотлари Эмбер ташкилоти томонидан тайёрланган бўлиб, 2024–2025 йилларни ўз ичига олади деб хабар берди naked-science.ru.
Рақамли технологиялар соҳасидаги жаҳон ишлаб чиқариш қувватларининг деярли бешдан уч қисми биргина Хитойга тўғри келади. Унинг ишлаб чиқариш экотизими смартфонлар ва компьютерлар, дисплейлар, босма платалар ва бошқа электрон компонентларни ишлаб чиқаришни ўз ичига олади. Хитойнинг улуши 58,8 фоизни ташкил этади. Бу 10,2 фоиз билан иккинчи ўринни эгаллаган Тайвандан деярли олти баравар кўп демак. Шунингдек, Хитойнинг ишлаб чиқариш қуввати рейтингда келтирилган бошқа барча мамлакатларнинг умумий улушидан юқори.
Хитой яримўтказгичлар, сунъий интеллект ва бошқа стратегик муҳим технологияларни ривожлантиришни назарда тутувчи янги беш йиллик режа доирасида электроника саноатидаги мавқеини мустаҳкамлашда давом этмоқда. Пекин Ғарб технологияларига қарамликни камайтиришга интилаётгани сабабли, чипларни ишлаб чиқаришни ўз ичига олган бутун интеграл схемалар занжирига алоҳида эътибор қаратмоқда. 2030 йилга бориб, ушбу соҳалар билан боғлиқ тармоқларнинг умумий даромадини 4,5 триллион долларга етказиш режалаштирилган.
Дунёдаги қувватларнинг яна 21,7 фоизи Тайвань, Жанубий Корея ва Японияга тўғри келади. Шундай қилиб, тўртта етакчи давлат биргаликда 80,5% ни ташкил этади. Уларнинг ҳар бири глобал технологик таъминот занжирида муҳим ўрин тутади.
Тайвань яримўтказгичлар ишлаб чиқариш ва электроника йиғиш бўйича энг йирик марказлардан бири ҳисобланади, Жанубий Корея, хусусан, яримўтказгичлар ва дисплейлар ишлаб чиқаришга ихтисослашган, Япония эса узоқ вақтдан бери шаклланган электроника саноатига эга. Ушбу иқтисодиётлар биргаликда яримўтказгичлар, электрон компонентлар ва дисплейлар ишлаб чиқариш, шунингдек, тайёр техника ишлаб чиқаришни ўз ичига олган зич минтақавий ишлаб чиқариш занжирини ташкил этади. Бош қароргоҳи ушбу бозорларда жойлашган йирик компаниялар орасида TSMC, Foxconn, Samsung, BOE ва Sony бор.
Шарқий Осиёнинг тўртта етакчи давлатидан ташқарида бешинчи ўринни Ҳиндистон эгаллайди — унга жаҳон ишлаб чиқариш қувватларининг 3,8 фоизи тўғри келади. Вьетнам 3,6% кўрсаткич билан бироз ортда қолмоқда. Кейинги ўринда АҚШ - 2,9%.
Рейтингга Жануби-Шарқий Осиёнинг бир қанча давлатлари ҳам киритилган. Таиландга жаҳон қувватларининг 1,3 фоизи, Сингапурга 0,7 фоизи, Малайзияга 0,6 фоизи, Индонезияга 0,3 фоизи тўғри келади. Таққослаш учун, тақдим этилган маълумотлар тўпламида Европанинг энг йирик мамлакати бўлган Германия атиги 0,7% ни ташкил этади.
