Ёз мавсумида ёқилғи-энергетика тизими объектларининг барқарор ишлашини таъминлаш, истеъмолчиларни электр энергияси билан узлуксиз таъминлаш ҳамда ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш масалалари юзасидан Республика штабининг навбатдаги йиғилиши бўлиб ўтди.
Йиғилишда Энергетика вазирлиги ва ёқилғи-энергетика тизимидаги ташкилотлар раҳбарияти, Бош прокуратура, Фавқулодда вазиятлар вазирлиги, Саноат, радиация ва ядро хавфсизлиги қўмитаси, “Ўзэнергоинспекция”, вилоятлар ва Тошкент шаҳар ҳокимликлари ҳамда бошқа тегишли вазирлик ва идоралар вакиллари иштирок этди.
Йиғилишда ёз мавсумини беталафот ўтказиш, электр энергияси истеъмоли кескин ошадиган кунларда истеъмолчиларни узлуксиз электр энергияси билан таъминлаш, энергетика объектларининг 24 соатлик иш режимини кучайтириш, авария бригадаларининг шайлигини ошириш ҳамда режали таъмирлаш ишларини жадаллаштириш масалалари атрофлича муҳокама қилинди.
Таъкидланганидек, кутилаётган иссиқ кунларда республика бўйича суткалик электр энергияси истеъмоли 280 млн кВт·соат, максимал юклама эса 13–13,3 ГВтгача етиши прогноз қилинмоқда. Шу боис барча тизим корхоналарига электр узатиш тармоқлари ва подстанцияларнинг ишончли ишлашини таъминлаш, авариявий ҳолатларнинг олдини олиш ҳамда профилактик назоратни кучайтириш юзасидан қўшимча вазифалар белгиланди.
Шунингдек, Тошкент шаҳридаги айрим подстанцияларда кузатилган носозликлар ва улар оқибатида юзага келган авариявий узилишлар танқидий муҳокама қилинди. Йўл қўйилган камчиликлар учун тегишли масъулларнинг шахсий жавобгарлиги белгиланиб, айрим раҳбарлар эгаллаб турган лавозимидан озод этилди.
Кутилаётган иссиқ об-ҳаво шароитида бензин, дизел ёқилғиси ва суюлтирилган газни ортиш-тушириш ишларини саноат ва ёнғин хавфсизлиги талабларига қатъий риоя этган ҳолда, кучайтирилган назорат асосида ташкил этиш топширилди.
Шунингдек, ёнғин ва портлаш хавфини камайтириш мақсадида ҳаво ҳарорати юқори бўлган вақтларда суюлтирилган газни ортиш-тушириш ишларини вақтинча тўхтатиб туриш белгиланди.
Мазкур талаблар ижросини таъминлаш мақсадида Фавқулодда вазиятлар вазирлиги, Бош прокуратура, “Ўзэнергоинспекция” ҳамда Саноат, радиация ва ядро хавфсизлиги қўмитаси билан ҳамкорликда республика ҳудудларидаги энергетика объектлари ва ёқилғи инфратузилмасида ёнғин ҳамда саноат хавфсизлиги талабларига риоя этилиши юзасидан кучайтирилган ўрганишлар ва назорат рейдлари ташкил этилиши белгиланди.
Йиғилишда аввалги топшириқлар ижроси ҳам танқидий кўриб чиқилди. Масъул раҳбарларнинг шахсий жавобгарлиги яна бир бор эслатилиб, истеъмолчилар мурожаатларини тезкор кўриб чиқиш, авариявий ҳолатлар ҳақида аҳолини ўз вақтида хабардор қилиш ҳамда ҳудудлардаги навбатчилик тизимини янада кучайтириш бўйича аниқ топшириқлар берилди.
Шунингдек, коррупцияга қарши курашиш, ижро ва меҳнат интизомини мустаҳкамлаш масалалари муҳокама қилиниб, коррупцияга оид жиноятлар учун судланган ходимлар билан меҳнат муносабатлари бекор қилинаётгани қайд этилди. Тизимда коррупцияга нисбатан муросасиз ёндашув бундан буён ҳам қатъий давом эттирилиши таъкидланди.
Йиғилиш якунида барча тизим раҳбарлари қатъий огоҳлантирилди. Навбатдаги йиғилишларда, энг аввало, берилган топшириқлар ижроси, ҳудудлардаги ҳақиқий ҳолат ҳамда раҳбарларнинг шахсий масъулияти ва жавобгарлиги танқидий баҳоланиши қайд этилди.
