Эртага, 2026/2027-ўқув йили учун 1-синфга қабул учун ариза топшириш бошланади. Бу йил 795 мингдан ортиқ болаларни 1-синфга қабул қилиш режалаштирилган бўлиб, 7 ёшга тўладиган болалар қабул қилинади.
Мактабгача ва мактаб таълими вазирлиги маълумотига кўра, қабул жараёнлари бу йил ҳам икки босқичда амалга оширилади. Биринчи босқичда, яъни 20 июндан 31 июлгача аризалар болаларнинг бириктирилган микроҳудуди доирасида қабул қилинади. Иккинчи босқичда эса микроҳудуддан ташқаридаги қабул мактабларнинг бўш ўринлари ва имкониятларидан келиб чиқиб амалга оширилади.
Қайд этилишича, 2026–2027-ўқув йили учун 1-синфга қабул жараёнлари республика бўйлаб 5 690 та мактабда онлайн шаклда ташкил этилади. Бу эса мамлакатдаги барча мактабларнинг қарийб 60 фоизини ташкил этади. Тошкент шаҳри ва Бухоро вилоятидаги мактабларда эса қабул жараёнлари тўлиқ, яъни 100 фоиз онлайн шаклда ўтказилади.
“Таълим тўғрисида”ги қонунга мувофиқ, 1-синфга болалар 7 ёшга тўладиган йилда қабул қилинади. Шунга кўра, 2026-йилда 1-синфга борадиган болалар 2019 йил 31 декабрга қадар туғилган бўлиши лозим. 6 ёшли болалар учун эса мажбурий мактабга тайёрлов гуруҳлари фаолият юритади.
Ҳар бир мактабнинг микроҳудуди туман (шаҳар) ҳокимларининг қарори билан тасдиқланган. Ота-оналар my.maktab.uz платформаси орқали яшаш манзилини киритиб, фарзанди қайси мактабга бириктирилганини аниқлаши мумкин. Ариза топшириш жараёнида яшаш манзили ҳақидаги маълумотлар кадастр ва Ички ишлар вазирлиги базаларидан автоматик равишда олинади, бу эса тегишли микроҳудуддаги мактабга аризани хатосиз юбориш имконини беради.
Агар фуқаронинг уйида кадастр маълумотлари бўлмаса, 1 августдан кейин микроҳудуддан ташқари қабул бошланганида онлайн ариза топширишлари ва фарзандини мактабга жойлаштириш имкониятига эга бўладилар.
2026-2027-ўқув йилида 5 600 дан ортиқ мактабларга 1-синфга қабул жараёнлари онлайн тарзда ташкил этилади. Мазкур мактаблар рўйхати бу ерда танишишингиз мумкин.
Маълумот учун, 1-синфга қабул қилинган болалар учун 12 турдаги ўқув қуролларидан иборат Президент совғалари 10-августга қадар туман ва шаҳар мактабгача ҳамда мактаб таълими бўлимларига етказиб берилади.
