Бу ҳақда «Замон» кўрсатувида хабар берилди.
Хабарга кўра, Ҳайитов фамилияли эркак 2025 йил 3 ноябрь куни спиртли ичимлик таъсирида қайнотаси хонадонга келган ва у ерда икки нафар фарзанди билан яшаб келаётган турмуш ўртоғи билан учрашган.
Аниқланишича, аёл аввал алимент ундириш масаласида уни судга берган ва суд қарорига асосан эркак 15 суткага қамалган. Жазо муддатини ўтаб чиққанидан сўнг улар ўртасидаги можаро янада кучайган.
Тергов маълумотларига кўра, у алимент тўлашдан қочиш мақсадида турмуш ўртоғига ҳужум қилган, сўнгра эса 2023 йилда туғилган қизига ҳам тан жароҳати етказган.
Оқибатда бола воқеа жойида вафот этган, аёл эса шифохонага олиб кетилаётган вақтда жон берган. Жиноятдан сўнг гумонланувчи воқеа жойидан яширинган.
Жиноят ишлари бўйича Ўзбекистон тумани суди уни Ўзбекистон Республикаси Жиноят кодексининг 97-моддаси 2-қисми “а”, “в”, “ж”, “и” бандлари билан айбдор деб топиб, 19 йил муддатга озодликдан маҳрум қилди. У жазони умумий тартибли колонияда ўтайди.
Мазкур ҳолат оилавий низоларнинг оғир оқибатларга олиб келиши мумкинлигини яна бир бор кўрсатди.
