Бу эса, ўз навбатида, сув кутаётган фермер ва деҳқон хўжаликлари учун ҳам муҳим.
Тантанали тадбирда Фарғона вилояти ҳокими Хайрулло Бозоров, Сув хўжалиги вазирлиги вакиллари, тизим ташкилотлари раҳбарлари ҳамда соҳа масъуллари иштирок этди.
Сўнгги йилларда вилоятда сув ресурсларидан самарали фойдаланиш ва уларнинг исрофини камайтириш бўйича қатор ишлар амалга оширилди. Хусусан, 2020–2026 йилларда 181,7 минг гектар майдонда сув тежовчи технологиялар жорий қилинди, 3 870 та сув хўжалиги объекти рақамлаштирилди. Канал ва ариқларнинг 4 585 километри бетонлаштирилди.
Бу ишлар натижасида 350 миллион куб метр сув ва 16,1 миллион киловатт-соат электр энергияси тежалди. Шунингдек, 180 минг гектар майдоннинг сув таъминоти, 135 минг гектар ернинг мелиоратив ҳолати яхшиланди.
Ишлар жорий йилда ҳам давом эттирилмоқда. Йил бошидан буён 45,8 минг гектар майдонда сув тежовчи технологиялар жорий қилиниб, бу орқали йилига қўшимча 109,9 миллион куб метр сувни тежаш имконияти яратилди.
Бироқ сувни тежаш фақат замонавий технологияларни жорий этиш ёки каналларни бетонлаштириш билан чекланмайди. Уни манбадан экин майдонигача ўз вақтида ва белгиланган меъёр асосида етказиш ҳам муҳим. Бу жараёнда туманлардаги «Сув етказиб бериш хизмати» давлат муассасалари ходимлари асосий вазифани бажаради.
Янги автомобиллар айнан шу ишларни тезкор ташкил этишга хизмат қилади. Ходимлар канал ва ариқларнинг ҳолатини назорат қилиш, сув тақсимотини жойида ўрганиш, носозликларни аниқлаш ҳамда истеъмолчилар мурожаатларига тезроқ жавоб бериш имкониятига эга бўлади.
Тадбирда вилоят ҳокими Хайрулло Бозоров фермер ва деҳқон хўжаликларига сувни ўз вақтида ҳамда белгиланган меъёрлар асосида етказиб бериш устувор вазифа эканини таъкидлади.
Шундан сўнг хизмат автомобилларининг калитлари «Сув етказиб бериш хизмати» давлат муассасалари раҳбарларига топширилди.
