«Хавфсиз ва соғлом юрт» комплекс тезкор-профилактик тадбирлари доирасида Яккабоғ туманидаги муҳофаза этиладиган давлат ўрмон хўжалиги ҳудудида экологик қонунбузилиш ҳолати аниқланди.
Маълум бўлишича, «Mega Asia Coal and Quartz» хусусий корхонаси мансабдор шахслари геологик ўрганиш учун берилган рухсатномадан ўзбошимчалик билан фойдаланиб, тумандаги «Зармарс» кўмир конида кўмир қазиб олиш ва сотиш билан шуғулланган.
Ички ишлар вазирлиги Тезкор-қидирув департаменти ҳамда Қашқадарё вилояти Ички ишлар бошқармаси Тезкор-қидирув хизмати ходимлари ҳамкорлигида ўтказилган тадбирда корхона ходими Холмирзаев ноқонуний қазиб олинган 500 тонна кўмирни 350 миллион сўмга сотишга келишгани аниқланган.
У келишилган пулдан 50 миллион сўмни олаётган вақтида ашёвий далиллар билан қўлга олинган.
Бироқ бу билан экологик зарар чекланмаган. «Зармарс» кўмир конига йўл қуриш баҳонасида 24 туп ноёб Зарафшон арчаси, 9 туп учқат дарахти ва 3 мингга яқин бута илдизи билан қўпориб ташланган.
Дастлабки ҳисоб-китобларга кўра, табиатга етказилган зарар 480 миллион сўмдан ошган.
Мазкур ҳолат юзасидан корхона раҳбари Жомбоев ва бошқаларга нисбатан Жиноят кодексининг 229-моддаси ҳамда 198-моддаси учинчи қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
