Иккинчи жаҳон уруши йилларида фашизмга қарши курашган, фронт ортида меҳнат қилган инсонларга ҳурмат ва эҳтиром кўрсатиш ушбу сана мазмунининг ажралмас қисми ҳисобланади. Президент қарорига мувофиқ, айни кунларда мамлакатимиз бўйлаб фахрийлар ҳолидан хабар олиниб, уларнинг жасорати ва меҳнати муносиб қадрланмоқда.

Чилонзор туманида истиқомат қилувчи Тамара Цоколова хонадонида ҳам байрамона муҳит ҳукм сурди. Ички ишлар вазири генерал-лейтенант Азиз Тошпўлатов фахрийнинг уйига ташриф буюриб, Президент йўллаган табрикни ўқиб эшиттирди. Ленинград қамалини бошидан кечирган онахонга давлат мукофотлари топширилиб, мустаҳкам саломатлик тилади.

Шунингдек, болалиги концлагерда ўтган Мария Дегтяровага ҳам давлат раҳбарининг табриклари ва совғалари етказилди. Уруш йилларининг оғир хотираларини бошдан кечирган фахрий меҳмонларга миннатдорлик билдирди.

Иккинчи жаҳон уруши қатнашчиси Николай Петрунин ҳам байрам муносабати билан эъзозланди. Қозоғистонда туғилиб, кейинчалик ҳаётини Тошкент билан боғлаган фахрийга табрикнома ўқиб эшиттирилиб, эсдалик совғалари топширилди.

Анна Каримова, Мария Камарова, Наталя Спивак, Надежда Кудризкая ва Алла Фунтикова каби фахрийлар хонадонларида бўлиб ўтган учрашувларда ҳам тинчлик, сабр-матонат ва инсон қадри ҳақида самимий суҳбатлар кечди.

Фахрийлар давлат ва халқ эътиборидан мамнун эканликларини билдириб, бугунги тинч ва осойишта ҳаётнинг қадрига етиш лозимлигини таъкидлашди.

Бу каби тадбирлар ҳудудий ички ишлар органлари томонидан ҳам давом эттирилиб, уруш ва меҳнат фахрийларига ҳурмат-эҳтиром кўрсатиш ишлари изчил амалга оширилмоқда.