Тошкент вилояти ИИББ Кибержиноятларга қарши курашиш бошқармаси ходимлари томонидан Нурафшон шаҳар ИИБ тезкор ходимлари билан ҳамкорликда интернет тармоқлари орқали олинган маълумотлар асосида ўтказилган тезкор-қидирув тадбири давомида Тошкент шаҳри, Бектемир тумани ҳудудида ҳаракатланиб кетаётган “Nexia 3” русумли транспорт воситаси тўхтатилиб текширилган.
Натижада автомашинада бўлган фуқаро (Г.А. 1970 й.т.) аёлга тегишли бўлган буюмлар орасида чақалоқ кўринишидаги болалар ўйинчоғи борлиги ва унинг вазни нисбатан оғир эканлиги ходимларнинг эътиборини тортган.
Текширув давомида, аёл ушбу болалар ўйинчиғининг ички қисмига, 8 дона 100-150 граммдан қадоқланган, ўткир ҳидли тўқ жигаррангдаги “гашиш” гиёҳванд моддаларини жойлаштириб яширинча олиб ўтаётгани аниқланган.
Ҳолат юзасидан ўтказилган тезкор суриштирув ишлари натижасида аёл ушбу моддаларни Фарғона вилояти ҳудудидан сотиб олиб, Тошкент шаҳрига сотиш мақсадида олиб келаётганлиги аниқланди.
Жараёнда “Nexia 3” автомашинаси ҳайдовчиси “Яндекс” тизими орқали такси фаолияти билан шуғулланиши ва ушбу аёлни биринчи маротаба кўриб турганлиги маълум бўлди.
Ҳозирда аниқланган ҳолат юзасидан жиноят иши қўзғатилиб, гиёҳванд моддалар манбасини аниқлашга қаратилган тезкор суриштирув тадбирлари давом этмоқда.
Эслатиб ўтамиз, гиёҳвандлик воситаларининг ноқонуний муомаласи учун қонунчиликда 20 йилгача озодликдан маҳрум қилиш жазоси белгиланган.
